Wel 19 - Baibuli I Leb Kumam 2013

Buru me Atakit Akwar

¹ Rwot oko ciko Musa kede Aaron

² pi mino jo me Isirael iswilia kame lubo nogi. Jo me Isirael miero kel atakit akwar but Musa kede Aaron, atakit kalikame tie kede peko moro i kome, doko di likame pwodi koketo ayoko moro i ngute.

³ Aaron kede Musa bino mino atakit nono but Eleasar ngasaseredoti, di do oko tere ooko me kimere oko ngole di Eleasar neno.

⁴ Eleasar bino gwelo remo moro kede lwete di eko kikiro remo nono tien kanyaare i bad kame dok tetu nyim Eema me riamo.

⁵ Di do oko wango atakit nono lung di Eleasar neno; kobino wango kiton lau mere, ringo, remo, kede jamini me yie.

⁶ Ngasaseredoti bino kwanyo yat seda, emompir, kede ausi akwar di eko uco gi i mac kame kotie wango atakit nono iye.

⁷ Di do ngasaseredoti ko bino lwoko igoen mege di eko bol, en kamio eko dok i kimere. Do ber kong ebino dong di en dano kopwokere tuno ceng donyo.

⁸ Ngat kowango atakit nono da bino lwoko igoen mege di eko bol; eda ebino dong di en dano kopwokere tuno ceng donyo.

⁹ Di do ngat kalikame opwokere, ko bino ot jobo buru me atakit nono di eko keto gi kabedo kacil ooko me kimere. Kobino gwoko buru nono ooko me kimere pi jo me Isirael tic kede me iiko pii me lonyere. Manono obedo pwola kame kotimo pi kwanyo dub.

¹⁰ Ngat kojobo buru nono miero lwok igoen mege, do en ebino dong di epwokere tuno ceng donyo. Manoni bino bedo iswil kame jo me Isirael bino lubo pi kare lung, kiton jokumbor kame tie bedo i diere gi.

Ngat Komulo Kom Dano Oto

¹¹ Ngat komulo kom dano oto bino bedo dano kopwokere pi ceng kanyaare.

¹² En miero elonyere i ceng me adek kede i ceng me kanyaare kede pii me lonyere, di en eko doko cil. Do ka en likame elonyere i ceng me adek kede me kanyaare, en ebino dong di epwokere.

¹³ Jo dedede kame mulo kom dano oto di likame kiko lonyere dong di kipwokere, pien udo pii me lonyere likame kokikiro i kom gi. Gin kimunao Eema ka Rwot; jo kame cal kamagonogo kobino poko gi tenge kibut jo me Isirael.

¹⁴ Ka ngatamoro oto i eema, ngat kame oudo tie i yi eema iesawa me to mere, kede jo dedede kame donyo i yi eema nono, bino bedo jo kopwokere pi ceng kanyaare.

¹⁵ Agune da dedede kalikame koumo wi gi bino doko jamini kopwokere.

¹⁶ Ka ngatamoro omulo kom ngat kame koneko arabo kom ngat oto tuwo, amoto cogo me dano arabo ates, ngat nono doko dano kopwokere pi ceng kanyaare.

¹⁷ Pi kwanyo pwokere tenge, kobino juko buru mogo me atakit akwar kame oudo owango pi timo pwola me lonyere. Kobino keto buru nono i agulu, di oko oonyo pii me atan amol iye di oko rubo gi.

¹⁸ Di do dano kalikame opwokere ko bino kwanyo emompir di eko rwako i pii nono, di eko kikiro en i kom eema, i kom jamini me i yi eema, i kom jo kame oudo tie i yie, kede i kom ngat kame oudo omulo cogo me dano, kom ngat kame koneko, kom ngat oto tuwo arabo ates.

¹⁹ Dano kalikame opwokere bino kikiro pii nono i kom jo kopwokere, i ceng me adek kede i ceng me kanyaare. Iepone noni en ebino lonyo gi i ceng me kanyaare, di do gin kiko lwoko igoen gi di kiko bol, otieno di ceng odonyo gin kiko doko jo acil.

²⁰ Jo dedede kame pwokere di likame kiko lonyere dong di kipwokere, gin kobino poko gi tenge kibut jo me Isirael, pien gin kitwero munao Eema kacil ka Rwot. Etimere kamanono pien udo pii me lonyere likame kokikiro i kom gi.

²¹ Wun ibinunu gwoko iswil noni pi kare me anyim lung. Ngat kame kikiro pii me lonyere nono bino lwoko igoen mege, doko ngatamoroni kame mulo pii me lonyere bino dong di epwokere tuno ceng donyo.

²² Gimoroni kenekene kame ngat kopwokere mulo bino pwokere, doko ngatamoroni kame mulo dano nono bino bedo di epwokere tuno ceng donyo.