Wel 18 - Baibuli I Leb Kumam 2013

Tic me Josaseredoti kede Jolebi

¹ Rwot oko waco ne Aaron be, “In kede awobe ni, kede Jolebi ibinunu yeno peko me gikarac kame kotimo amakere kede kabedo kacil; do in kede awobe ni kenekene en kame ibinunu yeno peko me gikarac kame otimo amakere kede tic me josaseredoti.

² Aso, poore ikel imiegu ni da me ekeko ka Lebi, pi konyo wu kame in kede awobe ni itienu timo tic i Eema.

³ Gin kibino timo tic me konyo wun, kede timo tic me Eema lung. Do gin miero kur kinok jamini kame kotio kede i kabedo kacil, akadi noko alutari. Ka gin kilango kop noni, gin karacel kede wun ibinunu to.

⁴ Gin koketo gi pi tic kede wun, pi gin timo tice gi dedede me Eema me riamo, dano moro apat likame bino timo tic kede wun.

⁵ In kede awobe ni kenekene en kame miero itimunu tic me Kabedo Kacil kede me alutari, tetekeny lilo na bobo kur bin i kom jo me Isirael.

⁶ Ango en kame atieko yero imiegu ni Jolebi kikom jo me Isirael bala giamia buti kame komio buta, tetekeny gin kikaruno timo tic gi me Eema me riamo.

⁷ Do in kede awobe ni kenekene en kame ibinunu timo tic wu me josaseredoti kame mako alutari kede Kabedo Kacil Kalamo. Tic wu bala josaseredoti obedo giamia na butu; dano moro apat kame bino noko jamini kacil, kobino neke.”

Iner ka Josaseredoti

⁸ Rwot oko waco ne Aaron be, “Ango atieko mini akarunikin i kom giayala dedede kame jo me Isirael mio buta. Ango atieko mino gi buti kede awobe ni bala iner me josaseredoti kame kobino mino butu nakanaka.

⁹ Kikom jamini kalikame kowango, kacil kalamo, magi bino bedo megu: giayala me alos, giayala me kwanyo dub, kede giayala me timo cul. Gi dedede kame kokelo buta bala giayala kacil obedo meri kede awobe ni.

¹⁰ Bala kame gin kibedo kede gikacil kalamo, wun miero icamunu gi i kabedo kacil, doko cuo kenekene en kame romo camo gi.

¹¹ “Medo i wi manono, gi dedede kame kopoko kikom giamia kame jo me Isirael kiarao i nyima bino bedo meru. Ango atieko mino gi buti, but awobe ni kede anyira ni, pi kare lung. Dano moroni kalikame opwokere me diakal ni, romo camo gi.

¹² “Ango atieko mino wu gi dedede kame beco kalamo kikom jamini apura kame geo cek, kame jo me Isirael mia buli mwaka: mo me olibeti, bwini, kede alos.

¹³ Anyakini me giapura dedede kageo cek, kame jo kelo buta, bino bedo megu. Jo dedede kalikame opwokere me diakal ni romo camo gi.

¹⁴ “Gi dedede kame tie i Isirael, kame kotieko jalo buta bino bedo megu.

¹⁵ “Idwe kao dedede me jo kede me leini kame jo me Isirael mio buta obedo megu. Do miero iyei gamo sente kame koculo pi lako idwe kao, doko miero iyei gamo sente kame koculo pi lako kao me le kalikame cil.

¹⁶ Kobino lako idwe kame kitieko romo duwe acel me dongo. Kobino lako gi i wel kame kotieko moko me siliba akaya kany, di lubere kede gipim me kabedo kacil.

¹⁷ Do idwe kao me dok, romini, kede diegi likame kobino lako; gin kibedo gikacil. Ibinunu kikiro remo gi i kom alutari di ikounu wango kakamio gi bala giayala awanga kame ngwe kur buta.

¹⁸ Ringo gin bino bedo megu, bala kame icamunu kede kapumito kede amuro me tetu cam kame kokiarao buta.

¹⁹ “Ango atieko mino buti, but awobe ni, karacel kede anyira ni, giayala kacil dedede kame jo me Isirael kelo buta, bala gikame komio butu nakanaka. Manono obedo isikan kame ango atieko timo kede in kede ikwae ni, isikan kalikame koturo.”

²⁰ Rwot oko waco ne Aaron be, “In likame kobino poko ni lobo moro ki lobo me Isirael, doko in likame ibino bedo kede iner moro i diere gi. Ango en abedo iner nin kede gi dedede kame in imito.”

Iner ka Jolebi

²¹ Rwot oko waco be, “Ango atieko mino but Jolebi acel me tomon me gi dedede kame jo me Isirael mio buta. Manoni tie pi culo gi pi tic kame gin kitimo me gwoko Eema me riamo.

²² Cako nataman ot anyim jo me Isirael icegun likame bobo bino noko Eema me riamo, ka gin kilango kop noni raco bino bedo i wi gi di kiko to.

²³ Do Jolebi kenekene en kame bino timo tic me Eema me riamo. Ka dub moro otimere iye, manono bedo i wi gin. Manoni en iswil kalikame lokere pi kare me lwak wu dedede. Jolebi likame kobino poko negi lobo i Isirael,

²⁴ piento ango atieko mino gin, pi bedo mergi, acel me tomon me gi dedede kame jo me Isirael mio buta bala giayala. Manono en komio ango awaco negi be, gin likame kobino poko negi lobo i Isirael.”

Acel i kom Tomon kame Jolebi mio

²⁵ Rwot oko ciko Musa

²⁶ pi waco ne Jolebi be, “Ka wun ikounu gamo kibut jo me Isirael acel me tomon kame Rwot mio wu pi bedo megu, poore imiunu acel me tomon mere but Rwot bala giayala.

²⁷ Kobino maro manono bala giamia wun, kame rom aroma kede giayala me alos kede bwini anyen kame ngapur mio.

²⁸ Iepone noni wuda ibinunu poko giayala kame imiunu but Rwot ki i acel me tomon kame igamunu kibut jo me Isirael. Kikom jamini nogo ibinunu kwanyo kiye giayala ka Rwot di ikounu mino gi but Aaron ngasaseredoti.

²⁹ Ibinunu kwanyo giayala noni kikom jamini dedede abeco kalamo, kame jo me Isirael mio butu.

³⁰ Ka itiekunu mino jamini abeco adikinicel kame ipokunu, apat kodong mege do bedo megu, bala kame ngapur mio kede giayala mere me alos amoto bwini di apat kodong ko bedo mere.

³¹ Wun kede jo me diakale wu iromunu camo gi i karamoro kenekene, pien ebedo cul wu pi tic kame itimunu i Eema me riamo.

³² Likame ibinunu bedo kede raco moro ka icamenu, kwanyo di wun itiekunu mino but Rwot dul kame ber kalamo. Do likame ibinunu pwoko giamia kacil me jo me Isirael i yore me camo moro di pwodi likame imiunu dul kame ber kalamo bala giayala. Ka itimunu kamano, kobino neko wu.”