Wel 11 - Baibuli I Leb Kumam 2013

Jo Ongunguro

¹ Jo bin oko cako ngunguro but Rwot pi peko kame oudo kitie kede. Kakame Rwot oko winyo kede ingungur gi, en eko doko ger di eko mino mac owango kimere duc i bad tetucel.

² Do jo oko kok but Musa; Musa oko lego but Rwot di mac oko to.

³ Omio oko lwongo kabedo nono be Tebera, pien mac ka Rwot oliel oko wango kanono.

Jo Ongunguro pi Kec

⁴ Jokumbor mogo da oudo tie upere kede jo me Isirael; gin oudo kitie kede twon kiru me ringo, doko da kiton jo me Isirael oko cako ngunguro pi ringo di kiwaco be, “Okwe koto di otie kede ringo me acama!

⁵ Wan oyutuno i kare kame oudo otie kede Misiri, oudo ocamo aporogo me nono, kede ikwekwer, kede esuju apii pii, kede atungulu me egere apapat.

⁶ Do nan teko wa tie tiek. Likame tie gimoro kame otie camo kwanyo kenekene emana buli ceng.”

⁷ Emana oudo cal bala nyige mogo atitino di tar.

⁸ Jo oudo wire mono gi di kicoko gi, di kiko riego gi arabo kiko yoko gi kede apany pi doko alos, di kiko tedo gi kidoko mugati aperepere. Oudo emit ineno bala mugati kame kotedo kede mo.

⁹ En oudo ebino iwor kede toyo.

¹⁰ Musa oko winyo di jo ngunguro i kom kop nono, di kicungo i dog ikekon me kimere gi. Di cuny Rwot oko wang adikinicel, di Musa likame oko bedo kede yomcuny.

¹¹ Musa oko waco ne Rwot be, “Pinyo komio itie tero ngatic ni kirac kamano? Pinyo komio ili kede yomcuny i koma? Neningo nan itieko jalo na peko ka jogi dedede i wia.

¹² Benyo, ango en kame bin ayaco gi di ako nywalo gi, en komio in iwaco na pi tingo gi i kora bala ngapidi, di ako tero gi paka tuno i lobo kame in icikere iye pi mino joakwari gi?

¹³ Ango abino udo ringo kituai kame abino mino twon jogi dedede? Pien gin kitieko bino buta di kiwaco be ami gi ringo kicami.

¹⁴ Ango kena likame atwero gwoko jogi dedede, ebwono teko na!

¹⁵ Ka epone noni en kame in itie tero ango kede, mi kisa maki keda iko neka kicel atwal, tetekeny abwot ki can kame atie iye.”

Koyero Jotel Ot Kanyaare

¹⁶ Rwot oko waco ne Musa be, “Cok na joadongo ot kanyaare me Isirael, jo kame in ingeo be obedo joadongo kame koworo, di iko tero gi i Eema me ariamakin keda, di iko mino gi kicung kunono kedi.

¹⁷ Ango abino bino piny kunono di ako yamo kedi; di ako bino kwanyo twer mogo kame in itie kede di ako mino gin, di do gin kiko bino donyo konyi gwoko jo, tetekeny kur in iute kede gi in keni.

¹⁸ Nan wac ne jo be, ‘Lonyerenu pi ceng me diki; diki ibinunu bedo kede ringo me acama. Rwot otieko winyo koko wu di iparerenu be koto di oudo itienu kede ringo, be kuo oudo ber ne wu di oudo itienu Misiri. Pi manono, Rwot bino mino wu ringo di ikounu camo.

¹⁹ Likame ibinunu came pi ceng acel, arabo ceng are, arabo pi ceng kany, arabo pi ceng tomon amoto pi ceng ot are kenekene,

²⁰ do pi duwe acel, paka tuno en wok ki umu di eko doko rac ne wu, pien wun itiekunu dagi Rwot ngat kame tie i diere wu di ikounu ngunguro bute di iwacunu be oudo koto eber ka likame iyaunu ki Misiri.’ ”

²¹ Do Musa oko waco be, “Ango atie telo jo aromo bala tutumia tol kanyape (600,000) atwero ot kede tien gi; benyo benyo kame in itwero waco kede be, ‘Abino mino gi ringo kame kibino camo pi duwe acel?’

²² Akadi bed bala onek romini kede doke wa dedede, arabo omak aporogo dedede atie i nam, do pwodi likame obino sobolo pito gin dedede.”

²³ Rwot oko dwoko be, “Iparo be twer nango tie kede ajikini mere? Nan in ibino neno ka kop nango bino cobere kakare amoto li.”

²⁴ Aso, Musa oko donyo ooko di eko waco ne jo kop kame Rwot owaco; en eko coko jotel ot kanyaare di eko teero gi luko Eema ka Rwot.

²⁵ Di Rwot oko bino piny kede edou di eko yamo kede Musa, di eko kwanyo twer mogo kikom Musa di eko keto gi i kom joadongo ot kanyaare nogo. Kakame twer nono odonyo kede i kom gi, gin kiko cako murao kop bala inabin, do likame kiko bobo medo timo kamanono.

²⁶ Cuo are kikom joadongo, Eledad kede Medad, oudo oko dong i kimere gi. Twer ka Rwot di oko ot donyo i kom gida i kimere kunono, di gida kiko cako ilelem bala inabin.

²⁷ Awobi moro oko ringo ot waco ne Musa be, “Eledad kede Medad tie imurai bala inabin i kimere.”

²⁸ Di Yosua wot ka Nun, ngat koudo obedo konyo Musa cako di en pwodi awobi oko waco be, “Ejakait, oti iko gengo gi!”

²⁹ Do Musa oko waco ne be, “Benyo, nyeko tie maki keda? Oudo ango amito be koto Rwot omio twer mere but jo dedede tetekeny jo dedede dok inabin!”

³⁰ Di do Musa kede joadongo ot kanyaare nogo oko dok i kimere.

Rwot Ocwao Aluru

³¹ Yamo oko buko wok ki but Rwot, di eko kelo aluru ki nam di eko mino gi kipopoto kiraramun i nget kimere me jo me Isirael. Oudo kikumemo malo bala mita acel, di kiko umo kakame tie mairo atot atota i bad dedede.

³² Aso, jo oko bedo timo tic me coko aluru cenge nono paka yuto piny, di doko kiko meede iwor kiakia kede oru mere, likame tie dano moro kame mere likame oko tuno kilo tutumia acel. Gin kiko mono gi pi tuo lukaro kimere dedede.

³³ Do di pwodi oudo kitie kede ringo atot me acama, Rwot oko ngoi kede jo, di eko cwano negi aumpuli ager oko dwenyo gi.

³⁴ Omio oko donyo lwongo kanono be Kibirot Kataba (kame dwong mere be “Atesin me Jokiru”), pien bin koyiko jo kame oudo tie kede kiru me ringo kanono.

³⁵ Jo oko yai ki Kibirot Kataba di kiko ot gero kimere Kaserot.