Tito 3 - Baibuli I Leb Kumam 2013

Kuo me Ngakirisito

¹ Poore ipoi wi jo pi bedo jo kame jalere i loc me jopug kede wegi akarunikin, pi bedo jo kame wor, kede jo kame oikere pi timo bero i yore dedede.

² Likame kipoore yamo kop arac i kom ngatamoro, likame kipoore lok, do kipoore bedo jo kame mwol kede kame nyuto wor but jo dedede.

³ Pien wan ikom wa bin omingunu, oudo likame owinyunu kop, oudo korwenyo wa. Oudo obedo ipasoi me mit kede yomcuny apapat, di odubo kare wa i tim me cuny arac kede nyeko, jo oudo dagi wa doko wada oudo odagere wan kenwa kenwa.

⁴ Do kakame bero kede mwolo me amara ka Rubanga Ngalak wa oneeno kede,

⁵ en eko lako wa, likame pi tice kame wan otimo be pien wan opoore, do pi kisa mere. En etimo manoni i Tipo Kacil, ngat kame mio wa nywal me pii, en nywal me are, di okounu doko jo anyen.

⁶ Rubanga omio wa Tipo Kacil kede cunye lung i Yesu Kirisito Ngalak wa,

⁷ tetekeny pi kisa mere wek odok jo kopoore kame bino udo kuo kame bedo nakanaka kame gen wa tie iye.

⁸ Man kop me ateni. Ango amito in inyikakino yamo kope nogi tetekeny jo kame yei Rubanga par pi jalo kare gi i timo tice kabeco, kame beco twatwal doko di kikonyo jo dedede.

⁹ Do kur idony i piem me mingomingo, wapo nying joakwari, apokapoka, kede lok kame mako Iswil, pien gin kili kede bero moro doko kony gi li.

¹⁰ Do kame ngatamoro tie kede apokapoka, core tien me agege kede me are di do iko weke.

¹¹ In ingeo be dano kame cal kamano udo etieko abilor, doko udo en ngadubo; kop loe kene.

Acora kame Jiko

¹² Kame aoro Atema arabo Tukiko buti, tamakino kede teko ni dedede pi bino Nikopoli buta, pien ango atieko moko tam na pi bedo kuno i kare me ngico me piny.

¹³ Tamakino kede teko ni dedede konyo Sena ngat kame osiao kop me iswil, en kede Apolo, pi meede kede ot gi, doko nen be likame kirem kede gimoro.

¹⁴ Doko wek jo wa pwonyere jalo kare gi timo tice kabeco, tetekeny kikaruno mino kony mogo kame mitere susunyo; likame kipoore bedo kede kuo kalikame konyo.

¹⁵ Jo dedede kame tie keda omoti. Mot jo koyei dedede kame maro wa. Kisa ka Rubanga bed butu dedede.