Tito 2 - Baibuli I Leb Kumam 2013

Pwony me Ateni

¹ Do in miero ipwony gikame upere kede pwony me ateni.

² Wac ne cuo adongo pi bedo jo kame dio mit me kom gi, jo kame keto cuny gi, jo kame wi gi tamo, kede kame tie kede yei me ateni, amara, kede ikanyakin.

³ Kamanono da, wac ne mon kame odoko dongo pi bedo jo kame koworo pi iponeso gi, weko bedo jo kame dubo nying jo arabo ipasoi me amata. Mito kibed kede pwony me ateni,

⁴ tetekeny kikaruno pwonyo mon kame pwodi tino pi maro cuog gi kede idwe gi,

⁵ kibed mon kame wi gi tio, abongo tam me caro, jo kame gwoko ude gi kiber, jo kame mwol doko kame jalere i loc ka cuog gi tetekeny kur kimi jo cai kop ka Rubanga.

⁶ Kamanono da, wac ne cuo atino pi bedo jo kame dio mit me kom gi.

⁷ I gi dedede bed anyut me tice kame beco, kede i pwony ni nyut ateni ni kede keto cuny.

⁸ Pwony kop kakare, kop kalikame ngatamoro twero bedo kede acae iye; di do lewic ko bino mako ngat kame piemo kede wa, pien udo likame etie kede gimoro arac kame etwero waco i kom wa.

⁹ Wace ipasoi pi jalere i loc me jodongo gi kede kiyom cuny gi i yore dedede, kur kidwoko dog gi,

¹⁰ arabo timo kuwo, do kinyut atwal be gin kigenere kitek, tetekeny i gi dedede kikel deyo i kom pwony ka Rubanga Ngalak wa.

¹¹ Pien kisa ka Rubanga otieko neeno, di eko kelo ne jo dedede alako.

¹² Kisa nono pwonyo wa weko kuo me dagi Rubanga kede mit me piny, kede pi bedo jo kame dio mit me kom, jo kame tie kede ekite koriere kede kuo me woro Rubanga i piny kan,

¹³ di okurunu kede gen winyo kame bino bino, i Ceng kame deyo ka Rubanga wa adwong Ngalak Yesu Kirisito bino neeno kede.

¹⁴ En nono kame ejalere pirwa, pi lako wa ki tim areco dedede, kede pi lonyo jo kame poore bedo mege, jo kame keto cuny gi timo tice kabeco.

¹⁵ Pwony gi kope nogi, kwai cuny gi, doko retakino gi kede akarunikin lung. Kur ngatamoro cai.