Tito 1 - Baibuli I Leb Kumam 2013

Amot

¹ Baluwa kowok kibut Paulo ngatic ka Rubanga kede ngaor ka Yesu Kirisito, kame ooro pi medo yei me jo kame Rubanga oyero, kede pi medo ngec gin me gi me ateni, di lubere kede kuo kame nyuto wor but Rubanga,

² kede pi mino gi gen me kuo kame bedo nakanaka. Rubanga, ngat kalikame ngalo, riki sek ocikere pire,

³ di i kare kopoore en eko nyute i kop mere kame kogena kede, kame ango ako pwonyo pi cik kame Rubanga Ngalak wa omia.

⁴ But Tito, atin na obe i yei kame onywako. Kisa kede mulem ka Rubanga Papa kede Kirisito Yesu Rwot wa bed buti.

Tic ka Tito i Kurete

⁵ Ango oudo aweki i cula me Kurete tetekeny itemuno gikame pwodi mito aika, di iko yero joadongo i bomba acelacel bala kame oudo atieko waco ni.

⁶ Joadongo nogo miero bed jo kame li kede raco moro, ngat acelacel kikom gi miero bed kede dako acel, kede di idwe mege oyei Kirisito di likame kitie atatai arabo kitie kede ngut gi.

⁷ Pien bisop, bala ngagwok ka Rubanga, miero bed abongo raco moro, kur ebed ngaewaka, arabo ngangoi, arabo ngamera, arabo ngagero, amoto bedo kede eranga me mito ud,

⁸ do en miero ebed ngat kame gamo jo, kame maro gikaber, ngat kame wie tamo, kame ekite mege beco, ngat kame mire i yei kede kame dio mit mege.

⁹ Miero emok kitek i kom kop kame kotwero geno, kame riamo kede kop kame kopwonyo, tetekeny ekaruno mino pwony kame tie kakare, kede da eko bwono tam me jo kame tie kede piem iye.

¹⁰ Pien joepali tie tot, jo kame yamo atatai, kede joangalo, twatwal mere jo kame kokepo di kiko lokere kidoko jokirisito;

¹¹ miero geng yamo gi nogo, pien kitie kelo atotolun i miere atot pi pwonyo gi kalikame poore apwonya, kame gin kipwonyo pi mono ud kalikame ber.

¹² Ngat acel kikom gi, enabi gi kikome, owaco be, “Jo me Kurete nakanaka obedo joangalo, kical bala leini kame ger, jocam kame nyap.”

¹³ Kop kame kowaco no tie kakare. Pi mano, bunano gi kitek, me wek amoto kibed kede yei me ateni,

¹⁴ akaka amakakin winyo kop me itatam me Iyudayan arabo cik me jo kame dagi ateni.

¹⁵ Gi dedede cil ne jo kame tam gi cil, do ne jo kame tam gi opwokere, jo kame li kede yei, likame tie gimoro kame cil, pien tam gi kede ngec me cuny gi otieko munaun.

¹⁶ Gin kiwaco be kingeo Rubanga, do gikame kitimo nyuto be kikwie. Rubanga dagi epone me jo nogo, jo kalikame winyo kop, jo kalikame romo timo gimoro aber.