Tice 3 - Baibuli I Leb Kumam 2013

Kocango Engwalas

¹ Kikano, Petero kede Yokana oudo tie ot i tempulo esawa kanyangon me otieno, kame oudo obedo esawa me ilega.

² Bin tie icuo moro kongwalo cako nywale, kame oudo kotie tingo. En oudo jo tinge ceng dedede di kiko kete i dog erute me tempulo, kame bin kolwongo be Erute Acil, pi kwano sente kibut jo kame donyo i tempulo.

³ Kakame eneno kede Petero kede Yokana di kitie mito donyo i tempulo, en eko kwano kony kibut gi.

⁴ Petero kede Yokana oko ngine kitek, di kiko waco ne be, “Nen wa.”

⁵ Engwalas nono oko keto tam mere i kom gi, di oudo etie kede gen me udo gimoro kibut gi.

⁶ Do Petero oko waco ne be, “Ango ali kede sente siliba arabo saabu kame ayaro mini, do ango ayaro mini gikame atie kede. I nying Yesu Kirisito me Nasaret, yai malo iko cako ot.”

⁷ Kikano Petero oko mako cinge tetu cam di oko kiarao en malo; cucuto nono tiene oko doko tek.

⁸ En eko somo malo eko cungo, di eko cako ot. En eko donyo i tempulo karacel kede gi di esosomo, di epako Rubanga.

⁹ Jo dedede oko nene di etie ot doko di epako Rubanga.

¹⁰ Gin kiko niang be icuo kame oudo lem bedo i dog Erute Acil me tempulo di ekwao sente inonono; kiko uro twatwal gi kotimere ne.

Kop kame Petero Owaco i Tempulo

¹¹ Di pwodi icuo nono omoko i kom Petero kede Yokana i balasa kame kogero wie, kame bin kolwongo be Balasa ka Sulumani, jo dedede oko ringo karacel but gi kunono, di kom gi oto adikinicel.

¹² Kakame Petero oneno kede kamano, en eko waco ne jo be, “Jo me Isirael, pinyo komio itienu uro gini, arabo pinyo komio itienu ngino wa ineno bala wan omio icuo ni ooto pi twer wa, arabo be pien wan oworo Rubanga adikinicel?

¹³ Rubanga ka Aburaam, Rubanga ka Isaka, Rubanga ka Yakobo kede Rubanga me joakwari wa bin otieko mino deyo but ngatic mere Yesu, kame wun ikounu mino i cing wegi apugan. Doko ikounu dage i nyim Pilato, do di oudo Pilato mito gonye.

¹⁴ Do wun ikounu dagi Ngat Kacil kede Kopoore, di ikounu penyo be gony ne wu nganek,

¹⁵ ikounu mino koneko ngat kame mio kuo, kame Rubanga oko yaruno kikom jo oto. Wan en ijurak me kop noni.

¹⁶ Aso, twer kame tie i nyinge, kede yei nyinge nono, en komio dano kame nan inenunu kede kame ingeunu noni odoko tek; doko yei i kom Yesu en komio i cuo noni ocango, di wun dedede inenunu.

¹⁷ “Do pi mano, jowota, ango angeo be wun itimunu mano pi kwina piny, bala kite kame jotel wu da otimo kede.

¹⁸ Do gikame Rubanga bin ogeo waco sek i dog inabin dedede be, Kirisito mere poore nen can, en inonono kame emio oko cobere.

¹⁹ Pi mano, wun miero iswilarunu, di ikounu lokere but Rubanga, tetekeny elwok dub wu tenge, me wek Rwot mi wu kare me wei.

²⁰ Di do Rubanga ko bino cwano ne wu Kirisito kame bin en etieko yero, en Yesu,

²¹ en ngat kame miero edong malo ebed iye tuno kede i kare kame kobino mino kede gi dedede doko nyen, gikame Rubanga bin owaco i dog inabin mege kacil.

²² Musa bin owaco be, ‘Rwot Rubanga bino cwano ne wu enabi kikom imiegu wu bala kite kame ecwa kede. Wun miero ilubunu gi dedede kame en ebino waco ne wu be itimunu.

²³ Do ngat kalikame bino lubo gikame enabi no bino waco, kobino poke tenge kikom jo di oko neke.’

²⁴ Doko inabin dedede kame bin oyamo cako i kare ka Samuel, kede kame oko bino i cen da, bin oyamo kope kame mako ceng nogi.

²⁵ Wun ibedunu ikwae me inabin kede me isikan kame bin Rubanga osikano but joakwari wu, di ewaco ne Aburaam be, ‘Kobino mino winyo but atekerin dedede me lobo kibut ikwae ni.’

²⁶ En komio ingei Rubanga yero ngatic mere, ber kong en eko cako cwane butu, pi mino wu winyo me en loko ngat acelacel kibutu ki tim wu areco.”