Tice 27 - Baibuli I Leb Kumam 2013

Kotero Paulo Roma

¹ Kakame komoko kede be wan poore okwang ooti Itali, oko mino Paulo kede mabus ace i cing ngadwong me isirikalen me ekodet ka Agusito, kame oudo nyinge Julias.

² Wan oko donyo i emeri moro me Aduramatio, kame oudo oyaro ot tuno i idoketa me Esia. Wan oko kwang oupere kede Arisitaku kame obedo dano me Makedonia, kame oudo wok ki Tesalonika.

³ Oru mere oko tuno Sidon. Julias oko timo Paulo ber, en eko weke eoto but jowote pi gin gwoke.

⁴ Oko yai ki kuno, do pi kite kame oudo yamo buko kede wok ki nyim wa, wan oko kwang oririo ki nget cula me Sipuro pi dapo yamo.

⁵ Kakame okwango kede di oko ngolo nam ki nget Kilikia kede Pampulia, oko tuno Mura kame tie i piny me Lisia.

⁶ Ki kuno, ngadwong me isirikalen oko udo Emeri moro kame bin owok ki Alekesanderia di eoto Itali, en eko rwako wa iye.

⁷ Di oko kwang momot pi ceng atot, oko tuno Kinido peko peko. Kite kame yamo oudo likame yei ne wa meede kede ot, omio oko kwang oririo Kurete di odapo Salamone pi lworo yamo.

⁸ Oririo kane kede peko adwong di oko tuno kabedo kame kolwongo be Edoket Aber, kame oudo iyapiyapi kede bomba me Lasea.

⁹ Bala kite kame oudo otieko tero kede kare alac, doko oudo beo ki nam otieko doko rac, pien kare me kanyo kec otieko kato. Di do Paulo oko mino gi ikwenyar be,

¹⁰ “Jodongo na, ango atieko ngeno be ot wa ni oyaro kelo awanon kede kei adwong, likame i jame kede i emeri kenekene, do kiton i kuo wa da.”

¹¹ Do ngadwong me isirikalen likame oko paro gikame Paulo owaco, do en eko keto tam mere i kom ngadwong me jokwang emeri kede won emeri erume.

¹² Kite kame oudo likame eber pi bedo i edoket nono i kare me ngico me piny, jo atot oko mino tam be oyai ki kuno di oko dok i nam, me wek amotoko winyo mak wa otun Poenike, kame obedo edoket kame tie Kurete, tetu malo me tetu kide kede tetu piny me tetu kide, di oko bedo kuno i kare me ngico me piny.

Yamo Atek Obuko i Nam

¹³ Kakame yamo me tetu piny ocako buko kede momot, gin kiko paro be kiudo do gikame oudo kimito, kiko kwanyo nangari ki pii, di kiko kwang kiririo cula me Kurete.

¹⁴ Oyotoyot yamo atek kame wok ki tetu malo me kide oko buko di ewok kiye itela;

¹⁵ kakame yamo ocere ne kede emeri, wan do oko jalakino emeri omol kede wa.

¹⁶ Kakame oringo obeo kede i nget cula moro atitidi kame kolwongo be Kauda, kame oudo ogalao ne wa yamo, oko cane di oko mako yee kame bedo cen me emeri;

¹⁷ ingei wane malo i emeri, gin kiko tweno tol rimaro di beo ki piny i dud emeri. Oudo kitie kede lworo be cengemogo kiromo pororo i asinge me dog nam, omio kiko didio mac me emeri, di do yamo oko molo emeri.

¹⁸ Kite kame oudo yamo tie puno wa kede kitek, oru mere gin kiko cako uco yec kame oudo tie i emeri i yi pii.

¹⁹ I ceng me adek mere, gin kiko donyo kwanyo jame mogo me tic me emeri di kiuco i pii.

²⁰ Kakame ceng kede acer likame oneeno kede pi ceng atot, doko di yamo atek oudo tie buko i kom wa, gen wa me bwot di do oko kwanyere atwal.

²¹ Kite kame oudo kitieko kede ceng atot abongo cam, Paulo oko yai ecungo i nyim gi di eko waco ne gi be, “Jo na, koto bin wun iwinyunu kop na di likame ikounu yai cako kwang ki Kurete, koto awanon kede kei likame obedo tie.

²² Do ango nan akwao wu imiunu cunyu bed nwang, pien likame tie ngatamoro kikom wa kame kuo mere bino rwenyo, kenekene emeri en koyaro kei.

²³ Pien iwor aoki, malaika ka Rubanga na kame ango aworo ocungo i ngeta,

²⁴ di eko waco na be, ‘Paulo, kur ibed kede lworo; in miero icung i nyim Kaisari. Doko neni, Rubanga otimi ber, eyaro mino jo dedede kame tie kedi i emeri bwot.’

²⁵ Pi mano, jo na, bedunu kede nwangcuny, pien ango atie kede yei i kom Rubanga be gi dedede bino bedo bala kite kame kowaco na kede kikokome.

²⁶ Do yamo kong oyaro cwano wa omotar i cula moro.”

²⁷ Iwor me ceng me tomon kiwie ongwon, di oudo otie mol ngolo nam adwong me Aduria, tetu esawa kanyape me iwor, jokwang emeri oko paro be oudo kinoko itela.

²⁸ Kiko uco tol i pii pi pimo tuto mere, di kiko udo tuto me pii oudo tie puti tol acel kede ot are; kiko nyiko momot bobo kiko pimo, di kiko udo tuto me pii tie puti ot kanyangon.

²⁹ Kite kame oudo kilwor kede be cengemogo emeri romo ot dipere i mori, omio kiko jalakino nangari ongwon ki dud emeri cen, di do kiko donyo lego be piny suny ru.

³⁰ Jo kame oudo kwango emeri oudo mito lwi, omio kiko yololo yee i nam, di kiko cuko be oudo kitie uco nangari ki nyim emeri.

³¹ Paulo oko waco ne ngadwong me isirikalen karacel kede isirikalen be, “Kwanyo di cuo gi odong i emeri, likame ibinunu bwot.”

³² Di do isirikalen oko ngolo tol kame oudo kotweo kede yee, di kiko jalakino en eoto.

³³ Di bin piny oyapuno ru, Paulo oko donyo ngangao gin dedede pi ber camo gimoro, di ewaco be, “Tin en ceng me tomon kiwie ongwon, kame wun itiekunu di tam wu tie atatai abongo camo gimoro.

³⁴ Pi mano, ango nan akwao cunyu be ber icamunu gimoro; ebino mino wu teko, pien likame tie ngatamoro kikom wu kame bino kei akadi yer wie acel.”

³⁵ Ingei yamo kamano, en eko kwanyo mugati, eko pwono Rubanga pire i nyim jo dedede, di eko tuturo eko cako camo.

³⁶ Di do gin dedede cuny gi oko dwogo, di kiko cam.

³⁷ (Wan dedede jo kame oudo tie i emeri oudo oromo jo tol are kede ot kanyaare kiwie kanyape.)

³⁸ Kakame do kitieko kede cam kiko yeng, gin kiko donyo uco ipukoi me engano i pii pi mino emeri doko yoyot.

Emeri Otuturun

³⁹ Kakame piny oru kede, jo kame bin kwango emeri likame oko twero ngeno itela kakatek kame oudo kituno iye, do kiko neno kakoguraun i dog nam, kame kiko tamo be ka koto twerere, koto kiwoto emeri iye.

⁴⁰ Gin kiko ngolongolo tol me nangari di kiko weko gi kilwiny i nam. Esawa nono da oudo kitie jajaro tol kame oudo kotweo kede gikame wiro nyim emeri; di do kiko wano esuka malo me nyim emeri, esuka kame yamo buke kede, kiko do mol ot i dog nam.

⁴¹ Do emeri oko dipere i asinge kame ebuka ocoko i dog nam di eko moko iye; ume oko moko dangadang, di ebuka oko turo dud emeri cen.

⁴² Isirikalen oko iiko tam me neko mabus tetekeny kur moro kikom gi sanyi di eko bwot.

⁴³ Do ngadwong me isirikalen oudo mito be Paulo bwoti, omio en eko gengo gi timo iik gi nono. En eko waco ne jo kame twero isany pi ber cako somo i pii di kiko isany ot itela kakatek.

⁴⁴ Do jo icegun ko bino mako ibaon kede adulion kotuturun me emeri. Manono oko mino jo dedede obwot oko tuno itela kakatek.