Tice 25 - Baibuli I Leb Kumam 2013

Paulo Ojuro Pido but Kaisari

¹ Kakame Pesito otuno kede i adul mere kame epugo, en eko tieko ceng adek di do eko yai ki Sisiria eoto Yerusalem.

² Jodongo me josaseredoti karacel kede joadongo me Iyudayan oko tatamo ne raco ka Paulo, di kiko kwano cunye

³ pi timo ne gi bero, emi ter Paulo Yerusalem do di gin oudo kitieko iikere pi ot kine i yongayo pi neke.

⁴ Do Pesito oko dwoko ne gi be kotie gwoko Paulo i otkol i Sisiria, doko eda kikome etie mito ot kuno i kare iyapiyapi.

⁵ En eko waco be, “Pi mano, wek joadongo wu upere keda kuno, di gin kiko pide, ka tie gimoro arac i kome.”

⁶ Ingei bedo kede gi pi kare kalikame kalamo bala ceng kanyauni arabo tomon, Pesito oko yai eoto Sisiria. Oru mere en eko bedo i kom mere me ngolo kop, di eko ciko be kel Paulo.

⁷ Kakame Paulo otuno kede, Iyudayan kame bin owok ki Yerusalem oko cungo oluke, di kiko cako kelo pido mogo atot adongodongo i kome, pido kalikame kitwero nyuto ateni gi.

⁸ Paulo oko pido be, “Ango likame aturo Iswil me Iyudayan arabo timo raco moro i tempulo amoto ne Kaisari akadi acel.”

⁹ Do pien Pesito oudo mito timo bero ne Iyudayan, omio en eko penyo Paulo be, “In imito be teri ot pidi i kope nogi i nyima i Yerusalem?”

¹⁰ Do Paulo oko dwoko be, “Ango atie cungo i nyim kom me ngolo kop ka Kaisari, kakame kopoore pida iye; doko da in kikomi ingeo kiber be ango gira likame atimo ne Iyudayan gimoro arac.

¹¹ Aso, ka ango abedo ngat arac di atimo gimoro arac kame poore mino koneka, ango likame ayaro mito be abwot ki to; do ka gikame kitie pida iye tiene li, likame tie ngatamoro kame tie kede twer me jala i cing gi. Ango ajuro pido na but Kaisari.”

¹² Ingei winyere kede kansulo mere, Pesito oko dwoko ne Paulo be, “In ijuro pido ni be ter but Kaisari; ibino ot but Kaisari.”

Kotero Paulo i nyim Aguripa kede Berenike

¹³ Ingei ceng mogo, Abaka Aguripa kede Berenike oko bino Sisiria pi gamo Pesito.

¹⁴ Di kitieko ceng atot kuno, Pesito oko tero kop kame kopido iye Paulo i nyim abaka di ewaco be, “Tie icuo kame Pelik oweko i otkol.

¹⁵ I kare kame ango oudo atie kede Yerusalem, jodongo me josaseredoti karacel kede joadongo me Iyudayan oko mina ngec i kom kop mere, di kikwao be ngol ne kop.

¹⁶ Do ango ako dwoko ne gi be, likame obedo ekite me Joroma pi jalo ngatamoro i cing jo di pwodi likame eriamakin kede jo kame tie pide wang i wang, me wek eda eud kare me pido i kom kope kame kopide iye.

¹⁷ Pi mano, kakame gin kicokere kede kan, ango likame ako gal, do oru mere ango ako bedo i kom na me ngolo kop, di ako ciko be kel icuo nono.

¹⁸ Kakame jo kame oudo pide oyai kede malo, likame kiko kelo pido moro arac i kome bala kite kame ango audo aparo be romo timere kede.

¹⁹ Do gin oudo kitie kede kope mogo kame kipiemo iye i kom edini gi, kede i kom icuo moro kame nyinge Yesu kame bin oto, do Paulo yamo be ekuo.

²⁰ Wia oko cungo epone kame amoi kede tien kop noni, omio ango ako penye ka oudo emito ot Yerusalem me wek ot pide ki kuno pi kope nogo.

²¹ Do kakame Paulo okwao kede be ber gwoke i otkol di kodaro kede kite kame ngapug adwong bino ngolo kede kop nono, ango di do ako ciko be ber gwoke tuno kede ka ango acwae but Kaisari.”

²² Aguripa oko waco ne Pesito be, “Ango kikoma amito winyo yamo me icuo nono.” Pesito oko dwoko ne be, “Ibino winyo yamo mere diki.”

²³ Oru mere Aguripa kede Berenike oko bino kede angosibib adwong, kiko donyo i ot me winyo kop, di kiupere kede jodongo me isirikalen karacel kede jo kame koworo i bomba. Pesito oko mino kokelo Paulo kanono,

²⁴ di eko waco be, “Abaka Aguripa karacel kede jo dedede kame tie kede wa kan, inenunu icuo kame Iyudayan dedede obako dog gi buta pire i Yerusalem kede i kan da, di kilelemo be kuo mere poore jiki.

²⁵ Do ango ako udo be likame etimo gimoro arac kame romo mino koneke. Aso kite kame en kikome eko juro kede pido mere but ngapug adwong, omio ango ako cwane.

²⁶ Do ango likame atie kede kop moro kibecokina i kom icuo noni, kame aromo wandiko ne ngadwong na. Pi mano, ango akele i nyimu, do singo twatwal i nyim in Abaka Aguripa, me tetekeny ka wan otieko pepenyo en, ango aromo udo kop moro kame make kame abino wandiko.

²⁷ Pien kibuta, eneeno gikame kony mere li pi cwano mabus i nyim ngapug adwong abongo nyuto gikame kopide iye.”