Tice 24 - Baibuli I Leb Kumam 2013

Kopido Paulo

¹ Di ceng okato kany, Anania kame oudo obedo Ngatel Josaseredoti oko bino kede joadongo mogo me piny, karacel kede won iswil kame nyinge Teretulo. Di kiko mino kop kame kipido kede Paulo i nyim ngapug.

² Kakame kolwongo kede Paulo i nyim ngapug, Teretulo oko cako pide kaman: “Adwong me awora Pelik, wan otie kede mulem adwong pi in, doko in en kame imio kokelo alokaloka abeco i piny wa kan.

³ Wan otieko gamo gi nogi kede pwoc adwong i yore dedede kede i kabedo dedede.

⁴ Do di likame ameede dubo kare ni, akwai itim mwol iwiny kwac wa pi esawa moro atitidi.

⁵ Wan otieko udo be icuo ni tie kede elol, doko tic mere en cako arubaruba i dier Iyudayan i piny lung. En ebedo ngatel me ekodet moro me jo me Nasaret.

⁶ En etamo munao tempulo da, do wan oko make,

⁷ (do Lusia, kame obedo ngadwong kame lo isirikalen dedede oko bino kede gero adwong, di eko mane ki cing wan, di ewaco ne jo kame oudo pide pi bino buti.)

⁸ Ida i komi ka ipepenyo en, ibino niang kibute gi dedede kame wan otie pide iye.”

⁹ Iyudayan oko donyo i pido nono di kimoko be kope nogo tie kamanono.

Pido ka Paulo i nyim Pelik

¹⁰ Kakame ngapug oporo kop kede cinge ne Paulo be egei yamo, Paulo oko waco kaman: “Kite kame ango angeo kede be in itieko bedo ngangolkop i piny wa kan pi mwakini atot, ango ayaro nan pido di atie kede yomcuny.

¹¹ Bala kite kame ida ibino udo kede ateni mere, pwodi likame ceng tomon kiwie are okato cako i ceng kame ango aoto kede Yerusalem pi woro Rubanga,

¹² di likame gin kiko wuda di atie piem kede ngatamoro arabo supo ekodet moro i tempulo arabo i sinagoga, amotoko i bomba.

¹³ Doko da likame kitwero nyuto ni be, gikame gin kipida iye tie me ateni.

¹⁴ Do ango ayei i nyimi be, ango aworo Rubanga ka joakwari wa di alubo Yongayo kame gin kitero be obedo ajange moro, doko ango ayei gi dedede kame tie i Iswil arabo kame inabin owandiko.

¹⁵ Atie kede gen i kom Rubanga, kame gida nogi ikom gi kiyei, be yaruno me jo opoore kede kalikame opoore bino bedo tie.

¹⁶ En komio ango nakanaka atamakino kede teko na dedede pi neno i cunya be, ali kede raco moro i nyim Rubanga kede i nyim jo da.

¹⁷ “Aso, ingei mwakini mogo ango nan ako bino pi kelo ne ateker na kony mogo kede kelo giamia na me woro Rubanga.

¹⁸ Kakame ango oudo atie timo kede gini, gin kiko wuda i tempulo di atieko lonyere abongo ekodet moro arabo woo. Do Iyudayan mogo kame oyai ki Esia da oudo tie kuno;

¹⁹ oudo koto gida kipoore bino i nyimi kan di kiko pida ka kitie kede kop moro i koma.

²⁰ Aso ka li, wek jogi ikom gi wac tim arac kame gin kiudo i koma i kare kame ango acungo kede i nyim kansulo,

²¹ kwanyo kenekene gikame ango bin awaco di acungo i diere gi be, ‘Tin kotie pida i nyimu kan pi kop kame mako yaruno me jo oto.’ ”

²² Do pi kite kame Pelik oudo tie kede ngec odocon i kom Yongayo nono, omio en eko ber peruno gi di ewaco ne gi be, “Ango ayaro ngolo kop wu noni ka Lusia ngadwong kame lo isirikalen dedede obino.”

²³ Di en eko ciko ngadwong me isirikalen be gwok Paulo, do di koweko ne kare moro me alakanar, doko kur geng ngawote moro mine kony.

Paulo i nyim Pelik kede Durusila

²⁴ Ingei ceng mogo, Pelik oko bino kede dako mere Durusila, kame oudo obedo Ayudayat. En eko cwano kolwongo Paulo obino bute, di kiko donyo winyo kop kame epwonyo i kom yei Yesu Kirisito.

²⁵ Kakame Paulo otatamo kede kop kame mako ngolo kop me ateni, dino mit me kom, kede ngolo kop me ajikini waru, lworo oko mako Pelik di eko waco ne Paulo be, “Ber kong ot tenge, ka audo kare abino bobo lwongi.”

²⁶ Bobo da Pelik oudo tie kede gen be Paulo romo mine sente moro, omio en eko donyo lwongo Paulo bute dikdik di kinywako yamo.

²⁷ Do ingei mwakini are, Porukio Pesito oko lunyo wang Pelik; do pi mito yomo cuny Iyudayan, Pelik oko weko Paulo odong i otkol.