Tice 21 - Baibuli I Leb Kumam 2013

Paulo Ooto Yerusalem

¹ Ingei wan pokere kede gi di oko kwang, oko rieno yongayo tuno Kosi. Oru mere di oko tuno Rode, oko yai ki kano oko tuno Patara.

² Kikano oko udo emeri kame oudo tie ngolo loka Poenisia, oko donyo iye di oko ot.

³ Kakame oudo oneno do kede Sipuro, oko bapar oweke i bad tetu ngodal, di oko kwang tuno Siria, oko cungo i edoket me Taya, pien oudo koyaro tako jame kame tie i emeri kuno.

⁴ Wan oko mono jo koyei Kirisito, oko bedo kede gi pi ceng kanyaare. Tipo Kacil oko telo gi di kiko waco ne Paulo be kur eoti Yerusalem.

⁵ Bin di do kare wan me bedo kuno otiek, wan do oko yai pi meede kede ot wa. Di gin dedede kede mon karacel kede idwe gi kiko nyamaro wa tuno ooko me bomba. Wan dedede oko riondiko piny i dog nam oko lego, di do oko motere me pokere.

⁶ Wan oko donyo i emeri di do gida kiko dok paco.

⁷ Kakame oyai kede ki Taya, oko tuno Potolemai, di oko motere kede jo koyei Kirisito di do ber oko bedo kede gi pi ceng acel.

⁸ Oru mere oko pokere kede gi, di oko ot tuno Sisiria, oko donyo i ot ka Pilipo, ngatuc ejiri, kame oudo bin obedo ngat acel kikom jo kanyaare ka, di do wan oko bedo kede en.

⁹ Pilipo oudo tie kede idwe anyira mege ongwon kalikame pwodi onyomere, kame bin tie kede giamia me imurai.

¹⁰ Di oudo wan pwodi otie meede bedo kuno pi ceng mogo, enabi moro kame nyinge Agaba bin oko bino ki Yudea.

¹¹ En eko bino but wa, di eko kwanyo ausi kame bin Paulo tweo kede egoe i piere, eko tweno kede cing Paulo kede tiene, di eko waco be, “Tipo Kacil owaco be, ‘Epone noni en kame Iyudayan me Yerusalem bino tweno kede won ausi noni, di kiko mine i cing jo kalikame Iyudayan.’ ”

¹² Kakame wan owinyo kede kamano, wan karacel kede jo kame oudo tie kuno di oko ngangao Paulo be kur eot Yerusalem.

¹³ Paulo oko dwoko be, “Nyo kame wun itienu timo, mam itienu koko kede dubo cunya? Ango kom atieko iikere me bedo i otkol, akadi kiton to i Yerusalem pi nying Rwot Yesu.”

¹⁴ Kakame do edagi yei kede kop wan, wada di do oko ling, di oko waco be, “Wek do gikame Rubanga mito timere.”

¹⁵ Ingei ceng nogo, wan oko iikere di oko ot Yerusalem.

¹⁶ Jo mogo me Sisiria kame oyei Kirisito oko upere kede wa, di kiko tero wa paka i ot ka Minasoni me Sipuro, ngat kame bin ogeo lubo Yesu sek. En nono kame wan oudo miero obed ture.

Paulo Owelao Yakobo

¹⁷ I kare kame otuno kede Yerusalem, jo koyei Kirisito oko gamo wa kede kilel.

¹⁸ Oru mere Paulo oko upere kede wa oko ot but Yakobo; joadongo dedede oudo tie kuno.

¹⁹ Ingei moto gi, Paulo oko cako tatamo ne gi kop dedede i yore i yore, i kom gikame Rubanga bin otimo i dier jo kalikame Iyudayan i tic kame en etimo.

²⁰ Kakame kiwinyo kede kop nono, kiko mino deyo but Rubanga. Gin di kiko waco ne Paulo be, “Omin wa i Kirisito, neningo ber Iyudayan jo tutumian kede tutumian kame otieko yei Kirisito, doko gin dedede kiketo cuny gi lubo Iswilia wa.

²¹ Kotieko waco ne gi kop i komi, be in itie pwonyo Iyudayan dedede kame bedo i dier jo kalikame Iyudayan pi weko lubo Iswilia ka Musa, di iwaco ne gi pi weko kepo idwe gi kede pi weko lubo itok wa.

²² Nan do nyo kame poore atima? Pien ateteni gin kiyaro winyo be in itieko bino.

²³ Pi mano, in do miero itim gikame wan oyaro waco ni. Wan otie kede cuo ongwon kame otieko ikwong pi weko lielo wi gi;

²⁴ ter jo nogo i ot di iko lonyere karacel kede gi, di in iko mino cul pi lonyere gi, tetekeny kiliel wi gi. Mano bino mino jo dedede ngeo be kop dedede kame oudo kotatamo ne gi i komi likame tie kop me ateni, do in gire ilubo Iswilia wa.

²⁵ Do i kom kop kame mako jo kalikame Iyudayan kame oyei Kirisito, wan otieko cwano ne gi baluwa kede tam kame wan omoko be miero kiwek camo gikame koyalo ne cal jwogi, kede camo remo, kede camo gikame kodeo adea, doko poore kiwek timo tim me caro.”

²⁶ Oru mere Paulo oko tero cuo nogo, di eko lonyere kede gi. Di do en eko ot i tempulo di eko mino ngec i kom awene kame lonyere bino cobere kede, di oko bino mino giayala pi ngat acelacel kikom gi.

Komako Paulo i Tempulo

²⁷ Di do bin ceng kanyaare oyapuno tiek, Iyudayan mogo kame bin oyai ki Esia, kame bin oneno Paulo i tempulo, oko supo jo i kome di kiko make

²⁸ di kilelemo be, “Okwecunu jo me Isirael, konyunu wa! Icuo ni en kame tie pwonyo jo i kabedo dedede pi dagi jo me Isirael, kede Iswilia wa, kede kiton tempulo kan da. Doko medo i wi mano, etieko kelo Jogurik i tempulo, di eko do munao kabedo kacil noni.”

²⁹ Pien gin oudo kineno Toropimu Ngaepeso di upere kede Paulo i bomba, omio kiko paro be Paulo oudo okele i tempulo.

³⁰ Di do bomba lung oko rubere, di jo oko bele ringo karacel, kiko mako Paulo, di kiko wane kitere ooko me tempulo, esawa nono di kiko cego ikekon me tempulo.

³¹ Kakame oudo kitie mito neke kede, kop oko tuno ne ngadwong me isirikalen me Roma be Yerusalem lung oudo otieko rubere.

³² Cucuto nono en eko kwanyo isirikalen kede jodongo gi, di kiko ringo kunono but gi. Kakame kineno kede ngadwong me isirikalen nono, kiko weko bungo Paulo.

³³ Di ngadwong me isirikalen nono oko ot mako Paulo, di eko waco ne isirikalen mege pi twene kede irikoi are. En eko penyere be ngai inonono kede nyo kame oudo etimo.

³⁴ Jo mogo kame tie i ekodet oko donyo yamo kope kalikame riamo. Kite kame oudo likame etwero ngeno kede kop me ateni pi woo me jo, omio en eko waco ne isirikalen mege be kiter Paulo i paco gi me isirikalen.

³⁵ Kakame etuno kede kayito i ot, isirikalen oko tinge atinga pi gero me jo;

³⁶ pien ekodet oudo tie lubo gi di kilelemo be, “Nekenu!”

Paulo Omio Pido mere

³⁷ Kakame oudo kiyapuno tuno kede i paco me isirikalen, Paulo oko penyo ngadwong me isirikalen be, “Itwero yei na waco ni kop moro?” En eko penyo Paulo be, “Benyo, ingeo leb Gurik?

³⁸ Benyo, likame in en kame dano me Misiri kame nyoronyoro ni okelo arubaruba di iko telo cuo tutumia ongwon kame jonek iko tero i tim?”

³⁹ Paulo oko dwoko ne be, “Ango abedo Ngayudaya me Taruso, anywali me bomba kame pire dwong i Kilikia. Ango akwai iyei na yamo kede jo.”

⁴⁰ Kakame koyei ne kede yamo, Paulo oko cungo kayito i ot, di eko didio jo kede cinge be ber kilingi. Kakame kiling kede, en eko yamo kede gi i leb Eburania di ewaco be: