Tice 2 - Baibuli I Leb Kumam 2013

Bino me Tipo Kacil

¹ Di do bin ceng me Pentekoti otuno, jo koyei Kirisito dedede oudo ocokere karacel.

² Cucuto di mor moro oko wokun ki malo bala buko me yamo atek, di eko romo yi ot dedede kakame gin oudo kitie bedo iye.

³ Gimoro oko neeno but gi i cal me leb mac, di eko popokun eko cungo i kom ngat acelacel.

⁴ Gin dedede kiko pong kede Tipo Kacil, di kiko cako yamo i leb kanyen, bala kame Tipo nono oudo mio gi kede.

⁵ Oudo tie Iyudayan mogo kame bedo i bomba me Yerusalem, gin oudo kibedo jo kame oudo woro Rubanga twatwal, kame oudo oyai ki adulion dedede kame tie i piny.

⁶ Mor nono oko mino jo atot ocokere karacel, di wi gi oko cungo, pien ngat acelacel kikom gi oudo winyo di koyamo leb mere.

⁷ Gin dedede kiko uro twatwal, di kipenyere be, “Mam jo kame tie yamo gi dedede obedo Jogalilaya?

⁸ Do pinyo komio ngat acelacel kikom wan kan tie winyo di koyamo leb me tur gi?

⁹ Wan jo me Pasia kede Mede, jo me Elam kede jo kame bedo Mesopotamia, jo me Yudea kede Kapadosia, jo me Pontu kede Esia,

¹⁰ jo me Purigia kede Pampulia, jo me Misiri kede adulion me Libiya, kame kopugo Sirene, karacel kede wele kame owok ki Roma, Iyudayan karacel kede jo kame olokere i edini wa,

¹¹ Jokurete kede Imwarabun, wan dedede owinyo di gin kiwaco tice me twer ka Rubanga i leb wa.”

¹² Gin dedede wi gi oko cungo di kiuro twatwal, di kipenyere ken gi ken gi be, “Man do ber dwong mere nyo?”

¹³ Do jo apat oko donyo nyero di kiwaco be, “Jogo omer kede bwini anyen.”

Kop kame Petero Owaco

¹⁴ Do Petero oko cungo kede joor tomon kiwie acel, di eko cako yamo kede jo kede dwan amalo be, “Jo na me Yudea, karacel kede wun jo dedede kame bedo Yerusalem, poore ingeunu kop ni kiber, doko cikunu yitu i kom gikame ango ayaro waco ne wu.

¹⁵ Jogi likame omer bala kite kame wun itamunu kede, pien esawa kom pwodi adek kenekene me odiko,

¹⁶ do man en gikame enabi Yoweri bin owaco be,

¹⁷ “‘Rubanga owaco be, i kare me ajikini, ango abino mino Tipo na but jo dedede, di idwe wu awobe kede anyira ko bino murao, kede awobe wu ko bino neno gianyuta, di jo oti ko bino leko lek atot.

¹⁸ Akadi kiton but cuo kede mon kame obedo jotic na, ango abino mino gi Tipo na i ceng nogo, di gin kiko bino murao.

¹⁹ Ango abino timo gi me isuur i malo, kede gianena i piny. Remo kede mac kede yiro apek bino bedo tie;

²⁰ kobino mino wang ceng doko col, kede wang duwe da bino doko bala remo, di pwodi Ceng adwong kede Ceng me deyo ka Rwot likame otuno.

²¹ Di do ngat acelacel kame bino lwongo nying Rwot ko bino udo alako.’

²² “Wun jo me Isirael, winyunu kope gi: Yesu me Nasaret en icuo kame Rubanga bin oyero, di eko nyuto ne wu i tice me twer, kede i gi me isuur, kede i gianena kame Rubanga bin otimo kibute i diere wu, bala kite kame wuda ingeunu kede.

²³ Yesu noni, ngat kame bin komio i akarunikin wu di lubere kede ngec ka Rubanga kede iik mere, bin wun ikounu mine i cing jodubo kame oko gure i kom musalaba di kiko neke.

²⁴ Do Rubanga bin oko gonye kikom kwir me to, di oko yaruno en, pien to oudo likame twero twene.

²⁵ Pien Daudi oudo owaco kop i kome be, “‘Ango aneno Rwot di etie i nyima nakanaka; en etie i bada tetu cam, tetekeny kur gimoro yayango ango.

²⁶ Pi mano, cunya oko bedo yom, doko leba da oko yamo kop me kilel; koma da bino bedo kede gen.

²⁷ Pien in Rubanga likame ibino jalo kuo na i kabedo me jo oto, akadi weko kom Dano ni Kacil top.

²⁸ In itieko nyuto na yongayo me kuo; tie ni keda bino mina apong kede kilel.’

²⁹ “Jo me Isirael jowota, ango amito yamo ne wu kede tekcuny kop kame ango angeo kiber i kom kwaru wa Daudi. En bin eto di oko yike, doko ates mere da pwodi tie but wa kan tuno tin.

³⁰ Pi kite kame oudo Daudi bin obedo kede enabi, doko di oudo engeo be Rubanga bin olairo bute di esikano be ebino keto ngat acel kikom ikwae mege pi lunyo kom mere me ajakanut,

³¹ en eko cako neno iyarun ka Kirisito sek, di en eko yamo kop mere. En ewaco be, “‘Likame kojalo ringokome i kabedo me jo oto, doko kome da likame obilo top.’

³² “Yesu noni en kame Rubanga oyaruno, doko kop noni en kame wan dedede obedunu ijura mere.

³³ Pi kite kame kotieko kiarao en kede i bad tetu cam ka Rubanga, kede piento en etieko gamo Tipo Kacil kame bin Papa ocikere pire, en eko nan onyo gikame inenunu kede iwinyunu no.

³⁴ Pien Daudi oudo bin likame ooto malo, do en kikome ewaco be, “‘Rwot Rubanga owaco ne Rwot na be, bed i bada tetu cam,

³⁵ tuno di ango atieko mini inyono jokwor ni i tieni bala abanya me teno tien.’

³⁶ “Pi mano, jo dedede me Isirael poore ngei ateteni be, Yesu noni, kame wun bin igurunu i musalaba, Rubanga otieko mine edoko Rwot kede Kirisito.”

³⁷ Kop noni oko cobo cuny jo, di kiko penyo Petero karacel kede joor icegun be, “Imiegu, nan wan do otim nyo?”

³⁸ Petero oko dwoko ne gi be, “Swilarunu di oko batiso ngat acelacel kikom wu i nying Yesu Kirisito, di Rubanga ko bino sasiro wu ki dub wu, di ikounu bino udo giamia me Tipo Kacil.

³⁹ Pien cikere noni tie piru kede pi idwe wu, kede pi jo dedede kame tie kakame boco da, jo dedede kame Rwot Rubanga wa lwongo bute.”

⁴⁰ Petero oko mino ijura but gi kede kope ace atot, di ebako ne gi doge be, “Wuda lakerenu ki alola kame oyaro bino i kom lwak kodubere me i kare ni.”

⁴¹ Ceng nono, oko batiso jo kame bin owinyo kop mere di kiko yei, di wel me jokirisito ceng nono oko meede kede jo aromo tutumia adek.

⁴² Gin kiko keto cuny gi winyo pwony me joor, bedo i nywak kede gi, camo mugati karacel kede lego kede gi.

Epone me Bedo me Jo Koyei Kirisito

⁴³ Jo dedede oko bedo kede lworo, pien joor oudo odonyo timo gi me isuur kede gianena atot.

⁴⁴ Jo dedede koyei Kirisito oudo bedo karacel, di kinywako jame gi.

⁴⁵ Oudo kicato jame gi di kipopoko lim kame kiudo ne jo dedede, di lubere kede rem kame ngat acelacel oudo tie kede.

⁴⁶ Doko ceng dedede oudo gin kilego i tempulo karacel, di kinywako mugati karacel i miere gi. Oudo kinywako cam kede cuny ayom kilajara,

⁴⁷ di kipako Rubanga, doko jo dedede oudo pwoyo gi. Ceng acelacel Rwot oko donyo medo i kom gi wel me jo kame oudo otieko udo alako.