Tice 14 - Baibuli I Leb Kumam 2013

Paulo kede Baranaba i Bomba me Ikoniam

¹ Kikano, di bin Paulo kede Baranaba oudo tie Ikoniam, kiko donyo karacel i sinagoga me Iyudayan, kop kame kiko yamo oko mino ekodet me Iyudayan karacel kede Jogurik oko yei Yesu.

² Do Iyudayan kalikame bin yei Yesu oko supo jo kalikame Iyudayan, di kimio gi tam arac i kom jo koyei Kirisito.

³ Do Paulo kede Baranaba oko bedo kuno pi kare alac, di kiyamo pi Rwot abongo lworo, Rwot di mio ijura i kom kisa mere i gianena kede i gi me isuur kame emio gi twer me timo.

⁴ Jo me bomba nono bin oko pokere: mogo opokere but Iyudayan, mogo but joor.

⁵ Kakame jo kalikame obedo Iyudayan, kede Iyudayan, karacel kede jotel gi bin otamakino kede mino joor aroma, di kimito didipo gi kede kide,

⁶ gin kiko ngeno di kiko ringo Lisitura kede Derube, kame obedo bomban kame tie Likaonia, kede i adulion ace da kame bin oluke;

⁷ di gin kiko tuco ejiri kuno.

Paulo kede Baranaba i Lisitura kede Derube

⁸ Oudo bin icuo moro tie Lisitura kame oudo tie bedo, en oudo likame etwero ot kede tiene; oudo konywale di engwalo, doko cako likame ebilo ot kede tiene.

⁹ En eko winyo Paulo di tie yamo; Paulo oko ngine kitek, di eko neno be oudo etie kede yei kame romo mine ecango.

¹⁰ Paulo oko yamo kede dwan amalo be, “Yai malo iko cungo kede tieni.” Engwalas nono oko yai malo di eko ot.

¹¹ Kakame ekodet bin oneno kede gikame Paulo otimo, gin kiko cako yamo kede dwan amalo i leb gi me Likaonia be, “Rubangan otieko wok piny but wa i cal me jo!”

¹² Kiko donyo lwongo Baranaba be Seus, kede Paulo be Kereme, piento en oudo ebedo ngayamo adwong.

¹³ Ngasaseredoti ka Seus, kame bin tempulo mere cungo ooko i nyim bomba oko kelo twonin kede ature acil i dog erute di oudo emito mino giayala karacel kede jo.

¹⁴ Do kakame Paulo kede Baranaba, kame obedo joor, owinyo kede kop no, gin kiko yeyeco igoen gi di kiko motar ooko i dier ekodet di kiwaco be,

¹⁵ “Jogi, pinyo komio itienu timo kamano? Wada obedo jo bala wun. Wan okelo ne wu Kop Aber, tetekeny iwekunu jamini kame kony gi li go, di ikounu lokere but Rubanga kakuo, ngat kocweo malo, kede lobo, kede nam, kede jame dedede kame tie i yi gi.

¹⁶ I kare kokato, Rubanga oudo oweko atekerin timo gikame cuny gi mito.

¹⁷ Do akadi kamano da, en likame eko weko jo abongo gikame nyute. Piento en etimo ne wu bero; emio kot ocwei ne wu ki malo, kede kare kame kelo amio; emio wu cam kede yomcuny.”

¹⁸ Bed bala joor bin otatamo kope go kamano, do likame kiko karuno gengo jo pi mino gi giayala.

¹⁹ Do Iyudayan mogo kame oudo owok ki Antiokia kede Ikoniam oko bino; gin kiko supo cuny jo, kiko didipo Paulo kede kide di kiko wane ooko me bomba di oudo kiparo be etieko to.

²⁰ Do kakame josiao ocokere kede bute oluke, en eko yai malo di eko donyo i bomba. Oru mere, en kede Baranaba kiko yai kioto Derube.

Paulo kede Baranaba Odok Antiokia i Piny me Siria

²¹ Kakame Paulo kede Baranaba otieko tuco kede ejiri i bomba me Derube di kiko loko jo atot oko yei Yesu, gin kiko dok Lisitura kede Ikoniam kede Antiokia.

²² Gin oudo kimio tekcuny but jo koyei Kirisito di kikwao gi pi dong di kitek i yei. Doko di kiwaco ne gi be, “Wan miero obeunu i peko atot pi donyo i Ajakanut ka Rubanga.”

²³ Kakame kitieko yero ne gi kede joadongo ki ikodeta dedede me jokirisito, di kilego kede kanyo kec, kiko mino gi i cing Rwot kame gin oudo kiyei.

²⁴ Di do kiko beo ki Pisidia kiko tuno Pampulia.

²⁵ Ingei tatamo kop i Peruga, kiko ot kilor Atalia;

²⁶ ki kuno, kiko kwang tuno Antiokia, kakame bin kokwao ne gi kiye kisa ka Rubanga pi tic aber kame oudo kicobo.

²⁷ Di bin kituno Antiokia, gin kiko coko ekodet me jokirisito dedede karacel, di kiko tatamo ne jo gi dedede kame Rubanga oudo otio kede gin pi timo, kede epone kame eyabo kede ekeko me yei ne jo kalikame Iyudayan.

²⁸ Di do Paulo kede Baranaba oko bedo kede gi kuno pi kare moro alalac.