Tice 12 - Baibuli I Leb Kumam 2013

Tidilo Jokirisito Omeede

¹ Tetu kare nono, Abaka Erode oko cako tidilo jo mogo kikom ekodet me jokirisito.

² En eko neko Yakobo omin me Yokana kede epima.

³ Kakame eneno kede be gi nono oyomo cuny Iyudayan, en eko mino komako Petero da. (Mano bin otimere i kare me ebaga me Mugati kame Arup li kiye.)

⁴ Kakame bin etieko mako kede Petero, en eko rwake i otkol, di eko mine i cing ikodeta ongwon me isirikalen pi dare, di oudo etie kede tam me kele i nyim jo pi pide ingei Ebaga me Kalamo.

⁵ Di do oko mino Petero obedo i otkol, do ekodet me jokirisito oko donyo ilega but Rubanga pire kede cuny gi lung.

Kogonyo Petero ki Otkol

⁶ Iwor kame ru ceng kame Erode oudo oyaro do woto kede Petero pi pide i nyim jo, Petero oudo tie nino i diere me isirikalen are di kotwee kede irikoi are, doko di isirikalen ace are da tie daro ekeko me dog erute me otkol.

⁷ Kikano, malaika ka Rwot oko neeno, di asara oko caro agola me otkol, en eko babapo nget Petero, eko cene di ewaco ne be, “Yai malo awakawaka.” Cucuto nono di irikoi popoto ki cing Petero.

⁸ Di malaika oko waco ne be, “Aso ngap igoen ni iko ngapo amuka da.” Petero oko timo kamanono. Di malaika nono oko waco ne be, “Aso rwai egoe ni me adoka di iko luba.”

⁹ Petero oko donyo ooko di oko lube. Petero oudo likame ngeo be gikame malaika nono otimo oudo tie me ateni; oudo eparo be etie neno gianyuta.

¹⁰ Kakame kikalamo kede isirikalen jodar me agege kede me are da, kiko do tuno i ekeko me lilim me dog erute me bomba. Di ekeko nono oko yabere ne gi en kene, di gin kiko donyo ooko, kiko cako lubo yongayo moro acel; cucuto di do malaika nono oko rwenyo oweke.

¹¹ Di do wi Petero oko yabere di eko waco be, “Nan do atieko ngeno kiber be Rwot en kame oudo ocwao malaika mere pi laka ki cing Erode kede ki gi dedede kame Iyudayan oudo oikere pi timo i koma.”

¹² Kakame Petero oniang kede gikame otimere noni, en eko ot paco ka Maria toto me Yokana, kame nyinge ace oudo Marako; jo atot oudo ocokere tie ilega kuno.

¹³ Kakame bin Petero okukungo kede ekeko me dog erute, nyako moro ngatic me ot, kame nyinge Roda oko bino pi yabo ne ekeko.

¹⁴ Do kakame ewinyo kede di eko niang be dwan Petero inonono, en eko ringo edok cen abongo yabo ekeko pi yomcuny, di eko waco ne jo be Petero oudo tie cungo i dog ekeko me erute.

¹⁵ Do gin kiko waco ne be, “In ipoi.” Do en eko cere ne gi di ewaco be Petero oudo tie cungo ooko. Gin di do kiko waco be, “Mano malaika mere!”

¹⁶ Do Petero oko meede kukungo ekeko. Kakame kiyabo kede ekeko, kiko nene di kiko uro.

¹⁷ Do en eko poro ne gi kop kede cinge be kilingi, di eko tatamo ne gi i yore i yore epone kame Rwot owote kede ki otkol. En eko waco ne gi be, “Tatamunu kop ni ne Yakobo karacel kede imiegu i Kirisito.” En eko yai eoto kabedo ace.

¹⁸ Kakame do piny oru kede, wi isirikalen jodar oko dubere pi gikame oudo otimere ne Petero.

¹⁹ Di bin Erode omoo Petero di likame eko twero udo, en eko donyo pepenyo isirikalen jodar, di eko mino cik be poore nek gi. Erode di do oko yai ki Yudea eoto bedo Sisiria.

Erode Oto

²⁰ Kikano, Erode oudo olilo kede jo me Taya kede Sidon. Gin kiko ot bute di kitie i ekodet acel; kiko ber cako kede loko tam ka Bulasito, kame bin oudo gwoko paco me abaka, di kikwae pi konyo gi yamo kede abaka kop me mulem, pien cam me piny gi oudo wok ki piny kame abaka pugo.

²¹ I ceng kame koiko, Erode oko ngapo engape mere me abaka, eko bedo i kom mere me ajakanut, di eko cako yamo kede gi.

²² Di jo oko lelemo be, “Etie yamo kede dwan rubanga, do likame dwan dano!”

²³ Cucuto nono di malaika ka Rwot oko mino tuwo odipo Erode, pien oudo likame emio Rubanga deyo. Kudiling oko came di eko to.

²⁴ Do kop ka Rubanga oko meede nyai, di jo atot oko yei.

²⁵ Baranaba kede Saulo oko yai do ki Yerusalem ingei ngetakino tic gi, di kiko tero Yokana kame kolwongo be Marako kidok kede.