Sepania 2 - Baibuli I Leb Kumam 2013

Enabi Ongangao Jo pi Swilaro

¹ Cokerenu karacel, Okwe wun ateker kalikame lewic mako, cokerenu

² di pwodi likame kotero wu tenge bala cucung kame yamo kuto, di pwodi lilo agwai ka Rwot likame obino i komu, di pwodi ceng me gero mere likame otuno.

³ Lokerenu but Rwot, wun jo dedede kame mwolere, jo kame bedo i lobo noni, wun jo kame ilubunu cik mege. Timunu gikame poore, di ikounu mwolere i nyim Rwot. Cengemogo ibinunu bwot ki alola i ceng me gero mere.

Rwot bino Mino Atekerin Koluko Isirael Alola

⁴ Likame tie dano moro kame bino dong i bomba me Gasa. Asikelon bino doko ameje. Kobino riamo tenge jo me Asidod i dier iceng, di oko bino riamo jo Ekuron ki bomba gi.

⁵ Ibinunu neno can wun jo Pilistia, jo kame bedo i dog nam. Rwot tie kede kop i komu. En ebino tieko wu di likame tie ngatamoro kame ko bino dong akadi acel.

⁶ Lobo wu kame tie i nget nam bino doko elet kame kimere me jokwat kede anok me romini tie iye.

⁷ Jo me Yuda kame bino dong kuo bino donyo bedo i lobo wu. Gin kibino kwano romini gi kanono, di ka piny oko yuto, kibuto i ude kame tie Asikelon. Rwot Rubanga gi bino paro pir gi di eko dwoko negi lonyo gi.

⁸ Rwot Rubanga Won Twer waco be, “Ango atieko winyo ayet kede anywar kame jo Moab kede jo Amon tie kede i kom jo na, di kiwakere be gin kibino mano lobo gi.

⁹ Pi mano, ango Rubanga akuo, Rubanga me Isirael, akwongere be Moab kede Amon kobino muducaro bala Sodoma kede Gomora. Gin kibino doko kabedo kame bure me munyo odure iye, kabedo kodubere atwal, doko okuto oduko iye. Jo na kame bino dong kuo bino yako gi di kiko mano lobo gi.”

¹⁰ Manoni en epone kame kobino mino kede jo Moab kede Amon alola pi tim gi me ewaka kede acae, kede pi ayet gi but jo ka Rwot me jo yi.

¹¹ Rwot bino kelo negi lworo atek. En ebino mino rubangan me wi lobo lung doko gimoro li, di do atekerin dedede ko bino wore, ateker acelacel i lobo gi.

¹² Wuda jo me Abisinia, Rwot bino mino koneko wu i yi.

¹³ Rwot bino tic kede twer mere i bad tetu malo, di eko muducaro Asiria. En ebino mino bomba me Ninebe doko kabedo kame jo li iye, kakotuo bala wi tim.

¹⁴ En ebino doko kabedo kame romini, doke kede leini me epone dedede bedo iye. Itukirin bino bedo i ameje mere, di kikok ki dirisan mege. Agak bino kok ki nyim ikekon. Jo bino tako di kiko tero tenge ibaon me seda kame koudo kogere kede.

¹⁵ Manoni en gikame bino timere ne bomba kame wakere pi teko mere di eparo be likame tie gimoro arac kame romo timere ne. Jo mege tamo be likame bobo tie bomba moro ace i wi lobo, kame kato mergi. Kong nen kite kame en etieko doko kede ameje, kabedo kame leini me obar bino wei iye! Jo dedede kame beo i ngete bino yisiro en di kiyayango wi gi.