Sakaria 9 - Baibuli I Leb Kumam 2013

Ngolo Kop ne Atekerin me Kio

¹ Man en kop kowok kibut Rwot: En etieko ngolo kop ne lobo me Kadarak kede ne bomba me Damasiko. Pien likame jo me ikekon me Isirael kenekene en kobedo mege, do kiton jo me bomba adwong me Siria da.

² Kamat, kame tie i ikor me Kadarak da obedo mere, kiton bomban me Taya kede Sidon kede diru dedede kame kitie kede obedo mege.

³ Taya ogero apama atek me gwokere; ekumemo nyonyo siliba bala asinge kede saabu bala apua me atie i gudi me bomba.

⁴ Do nataman Rwot bino kwanyo tenge gi dedede kame etie kede, di eko uco abar nono i dier nam adwong, di mac ko bino wango bomba nono.

⁵ Bomba me Asikelon bino neno manoni di lworo ko make. Gasa da bino neno manoni kede lito. Ekuron da cunye bino kwanyere. Abaka me Gasa bino to, di Asikelon ko bino dong nono abongo jo.

⁶ Icotaran en kame bino bedo Asidod. Rwot waco be, “Ango abino tieko ewaka me Pilistia.

⁷ Likame doko kibino donyo camo ringo kame remo tie iye, arabo cam me kwer. Jo kame bino bwot bino doko jo na, di kiko bedo bala jo me ot acel me ekeko ka Yuda. Jo me Ekuron bino doko jo na bala jo Yebu.

⁸ Ango abino kudo kima me daro oda tetekeny kur doko ngatamoro sure; likame tie doko ngatamoro kame bino mane di eko donyo tero jo kirac, pien ango aneno kede wanga epone kame jo na oneno kede can.”

Abaka me Kare me Anyim

⁹ Lelunu kitek wun jo me Sion! Lelemunu kitek wun jo me Yerusalem! Nenunu, abaka wu tie bino butu! En epoore, etie kelo alako; en ewanano punda, atin me punda.

¹⁰ Rwot waco be, “Ango abino kwanyo tenge cabalan ki Isirael, kede asigiran me yi ki Yerusalem; imalia me yi kobino dudubo. Abaka wu bino kelo anapakin i atekerin; ajakanut mere bino cakere ki nam adwong tuno i nam ocelu adwong, cako ki ecilet me Eupurate tuno i ajikini me wi lobo.”

¹¹ Rwot waco be, “Pi isikan na kedi, kame bin komoko kede remo me giayala, ango abino gonyo jo ni, abino gonyo gi ki bur ali kede pii, me bedo obukui.

¹² Mabus kame tie obukui di itienu kede gen, dokunu i kagwokere wu atek. Awaco ne wu be abino mino wu winyo akalamo angoce itienu kede tien are.

¹³ Ango abino tic kede Yuda bala tir me gweno emal, kede Isirael bala tongini me emal. Abino tic kede cuo me Sion bala ipimai, pi yi kede cuo me Guris.”

¹⁴ Rwot bino neeno i wi jo mege; en ebino gwegweo imalia mege bala meny me kot. Rwot bino kuto agwara mere, di eko ot kede apipiru me bad tetu piny timo asura.

¹⁵ Rwot me jo yi bino gwoko jo mege, di gin kiko bino muducaro wegi aporocet. Gin kibino mato remo gi bala bwini, di eko pongo wi gi lubulub bala awalo me remo kame kokikiro i isondana me alutari.

¹⁶ I ceng nono, Rwot Rubanga bino lako jo mege, pien gin kitie bala romini mege. Gin kibino rieny i lobo mere bala kidi me wel atie i ocoro me angosibib.

¹⁷ Gin kibino bedo ibus di kicil tin benyo! Engano bino mino ipongai kom gi bedo yot kede apongai da kom gi bino bedo yot pi bwini.