Sakaria 4 - Baibuli I Leb Kumam 2013

Gianyuta me Gicibo Etala

¹ Malaika koudo oyamo keda oko bobo dwogo, di eko cena, bala kame koceo kede ngat atie nino.

² En eko penya be, “Nyo kame itie neno?” Ango ako dwoko be, “Atie neno gicibo etala kame kotimo kome lung kede saabu. I wie tie iye bakuli. Italan kanyaare tie i wie, di buli etala tie kede doge kanyaare me upo ausin.

³ I nget gicibo etala nono tie iye yen olibeti are, acel i bad tetucel kede acel da i bad tetu ocelu.”

⁴ Ango ako penyo malaika nono be, “Adwong, gi nogi nyuto nyo?”

⁵ En eko penya be, “Likame ingeo?” Ango ako dwoko be, “Adwong, likame angeo.”

^10b Malaika oko waco na be, “Italan kanyaare obedo wang Rwot, kame eneno kede wi lobo lung.”

¹¹ Ango ako penye be, “Do yen are me olibeti atie i bad tetuni kede tetuca me gicibo etala cungo pi nyo?

¹² Doko da ajange are me olibeti kame onyo mo beo ki paipo me saabu dwong gi nyo?”

¹³ En eko penya be, “Likame ingeo?” Ango ako dwoko be, “Adwong, likame angeo.”

¹⁴ En eko waco be, “Magonogi obedo jo are kame Rubanga oyero di eko wiro pi tic nen, en Rwot me wi lobo lung.”

Cikere ka Rubanga but Serubabel

⁶ Malaika oko waco na pi waco ne Serubabel kop kowok kibut Rwot be, “In ibino karuno, likame kede teko amoto kede twer ni, do kede tipo nango, ango Rwot me jo yi en awaco.

⁷ Moru kame tie i nyimi no bino doko kakagereger. In ibino temuno gero tempulo; kakame itie keto kede kidi mere me ajikini me apama, jo bino ilelem be, ‘Ecil, Ecil!’ ”

⁸ Rwot oko bobo mina kop ace.

⁹ En ewaco be, “Serubabel ocibo acakini me apama me tempulo, en da kame ebino tieko gere. Kame manoni otimere, jo na bino ngeno be ango en kame acwai but gi.

^10a Jo kobedo kede acae pi tic atitidi i agege bino bedo kede kilel kame kineno Serubabel di etie kede gi me gedo i cinge.”