Sakaria 13 - Baibuli I Leb Kumam 2013

¹ “I kare nono kobino yabo atan me lonyo ikwae ka Daudi kede jo me Yerusalem ki dub kede ki pwokere.

² I kare nono ango abino weno tenge nying caljwogi ki lobo noni, tetekeny kur doko yutuno gi. Abino da kwanyo tenge jo kame sidiko be gin inabin, karacel kede cuny me pwokere.

³ Ka enabi moro ace oko doko neeno, papa mere kede toto mere kikome bino waco ne be, ‘In kobino neki, pien itie waco kop me abe i nying Rwot.’ Ka en eko timo imurai, papa mere kikokome kede toto mere bino cobe paka neke.

⁴ “Kame kare nono otuno, inabin nogo dedede lewic bino mako gi pi gianyuta me imurai kame kisidiko be kineno. Doko da likame kibino ngapo igoen ayer yer me inabin pi gin ngalo jo,

⁵ do ngat acelacel kibut gi bino waco be, ‘Ango likame abedo enabi. Ango ngapur; ango abedo puro lobo cako ango dongo.’

⁶ Ka ngatamoro oko penyo acel kikom gi be, ‘Aporeso me nyo igo atie i kori go?’ En ebino dwoko be, ‘Audo gi ki ot ka ngawota.’ ”

Cik me Neko Ngakwat ka Rubanga

⁷ Rwot me jo yi waco be, “Cei in epima di iko suro ngakwat na kobedo da ngawota! Neke di romini ko sasarun. Ango abino suro jo na

⁸ di i lobo noni dedede are i kom adek me jo ko bino totoun, di acel i kom adek me jo ko bino dong kuo.

⁹ Acel i kom adek odong kuo nogo abino keto gi i mac di ako lonyo gi bala jililo nyonyo siliba, di ako tamo gi bala tamo saabu kede mac. Di do gin kiko bino lego buta di ango ako gamo kwac gi. Ango abino waco negi be gin kibedo jo na, di gida kiko bino tuco kede dog gi be ango abedo Rubanga gi.”