Sabuli 97 - Baibuli I Leb Kumam 2013

Rubanga en Ngapug Adwong

¹ Rwot en abaka; mito jo me wi lobo leli; mito jo kame bedo i dog name da bed kede yomcuny!

² Idoun kede colo kame cucucuc oluke; en epugo i yore kopoore kede me ateni.

³ Mac en kame telo ne yongayo, di ewango jokwor mege kame oluke.

⁴ Meny mere caro piny; jo me wi lobo neno di kom gi ko miel.

⁵ Mori calar bala adipor i nyim Rwot, kicalar i nyim Rwot me lobo lung.

⁶ Malo tatamo poore mere; doko jo dedede neno deyo mere.

⁷ Jo dedede kame woro caljwogi komio lewic mako gi, jo kame wakere pi caljwogi, gikame kony gi li; rubangan dedede luro wi gi piny i nyime pi mine wor.

⁸ Sion winyo di cunye ko doko yom, bomban me Yuda da ko lelo, pi kope kame in ingolo, Okwe Rubanga.

⁹ Pien in, Okwe Rwot, in idwong twatwal, in ipugo wi lobo lung; in idwong kalamo rubangan apat dedede.

¹⁰ Rwot maro jo kame cuny gi dagi gikarac; en egwoko kuo me jo mege kame gene, en elako gi ki cing jo areco.

¹¹ Lero yabere ne jo kopoore, kilel da ne jo kame cuny gi ber.

¹² Lelunu pi gikame Rwot otimo, Okwe wun jo kopoore, di ikounu mine pwoc!