Sabuli 92 - Baibuli I Leb Kumam 2013

Wer me Pako Rwot

¹ Etie gikame ber pi mini pwoc, Okwe Rwot, wero wer me pako nyingi ber, Okwe Ngamalo Twal.

² Etie gikame ber pi rabo odiko acelacel kop me amara nin kalikame lokere, kede iwor acelacel da kop me genere nin,

³ di kogoo gita kede adungu, di kogoo wer amit kede arigirigi.

⁴ Pien tice nin, Okwe Rwot, otieko minango yomcuny; tice kame in itimo miango awero kede kilel.

⁵ Tice kame in itimo tin dongodongo benyo, Okwe Rwot! Tam nin tut twatwal!

⁶ Ngat kalikame wie tio likame karuno ngeno, doko ngamingo likame karuno niang be:

⁷ bed bala lonyo me jo areco meede bala lum kame lot, kede di kuo aber meede ne jo dedede kame timo gikareco, do gin kobino muducaro gi atwal,

⁸ do in, Okwe Rwot, ipugo gi dedede ikar kede ikar.

⁹ Pien jokwor nin, Okwe Rwot, bino to; jo dedede kame timo gikareco kobino sarakino.

¹⁰ Do in itieko minango adoko tek bala jobi; iwira kede mo.

¹¹ Atieko neno kede wanga kite kame jokwor na poto kede; doko awinyo kede yita koko me jo areco kame mito sura.

¹² Jo kopoore bedo kede kuo aber nakanaka bala tugo kame nyak nakanaka, doko kidongo bala yen seda me Lebanon.

¹³ Gin kical bala yen kame kopito i ot ka Rwot, yen kame dongo libaliba i diakal ka Rubanga wa,

¹⁴ kame pwodi nyak akadi i kare me tio gi; gin kilibaliba di pige tot i kom gi.

¹⁵ Manono nyuto be Rwot opoore; en etie lela nango, doko eli kede tim moro arac.