Sabuli 9 - Baibuli I Leb Kumam 2013

Pwono Rubanga pi Ngolo Kop i Ateni

¹ Abino mino Rubanga pwoc kede cunya dedede; abino tatamo gi me aura dedede kame in itimo.

² Cunya bino bedo yom di ako lelo piri; abino wero wer me pako nyingi, Okwe Ngamalo Twal.

³ Kame jokwor na owilun dok cen, gin kibino popoto piny i nyimi di kiko totoun.

⁴ Pien in ingolo na kop kiber, in ibedo i kom ni me ajakanut di iko ngolo kop kakare.

⁵ In itieko bunano atekerin apat, iko muducaro jodubo; itieko weno nying gi pi ikar kede ikar.

⁶ Jokwor na otiek atwal, in itieko puputo bomban gi da; likame bobo kotwero yutuno gi akadi acel.

⁷ Do Rwot bedo i kom mere me ajakanut ikar kede ikar; etieko cibo kom mere me ajakanut di tek pi ngolo kop.

⁸ En engolo ne piny kop iepone kopoore; en engolo ne atekerin kop kede cuny acel.

⁹ Rwot en kateko me jo kame kodio, en kateko i kare me peko.

¹⁰ Jo kame ngei i cuny gi bedo kede gen i komi; pien, Rwot, in likame iweko jo kame moi.

¹¹ Werunu were me pako Rwot, ngat kame bedo i Sion. Tucunu tice mege ngere but jo.

¹² Piento en ngat kame eculo kwor me jo kame koneko likame wie wil kede gi; likame wie wil kede koko me jo kame can opoto negi.

¹³ Mi kisa maki i koma, Okwe Rwot! Nen can kame jo adaga tie mina aneno! Laka ki to,

¹⁴ tetekeny atemuno tatamo kope dedede me paki i irutei me Yerusalem, di ako lelo pien ilaka.

¹⁵ Atekerin apat otieko popoto i bur kame kikunyo. Owic kame kiciko olokere mako tien gin nogo.

¹⁶ Rwot otieko mino jo ongee, pien engolo kop kakare. Jo areco lokere moko i owic kame cing gi en ociko.

¹⁷ Jo areco bino ot i kabedo me jo oto, karacel kede atekerin apat dedede kame dagi Rubanga.

¹⁸ Pien wi Rubanga likame bino wil kede jocan, doko da gen kame jocan tie kede likame bino kei nakanaka.

¹⁹ Okwe Rwot, yai! Kur imi dano adana bwoni; cok atekerin dedede i nyimi di iko ngolo negi kop.

²⁰ Mi lworo mak gi, Okwe Rwot; mi atekerin ngei be gin kibedo jo ajoa.