Sabuli 85 - Baibuli I Leb Kumam 2013

Kwano Rubanga pi Timo Bero

¹ Rwot in kisa omaki i kom lobo nin; idwoko abar me Isirael.

² In isasiro dub me jo ni; in iweko raco gi dedede.

³ In ijiko lilo ni dedede; iloko cunyi di iko weko bedo ger.

⁴ Dwok kuo wa dok cal bala bin sek, Okwe Rubanga Ngalak wa, di iko weko bedo kede wangcuny i kom wa.

⁵ Mam do iyaro bedo ger kede wan nakanaka? Mam do iyaro mino gero nin naparo lwak me kare dedede?

⁶ Benyo, likame bobo iyaro dwoko ne wa epone me kuo angoce, me wek jo ni leli pi gikame in itimo?

⁷ Nyut ne wa amara ni kalikame lokere, Okwe Rwot, di iko lako wa.

⁸ Wek kong awiny gikame Rwot Rubanga bino waco, piento en ebino waco kop me mulem but jo mege, gin jo mege agene, ka gin likame bobo kidok i tim gi me mingomingo.

⁹ Ateteni eikere pi lako jo kame lwore, me wek deyo mere bed i lobo wa.

¹⁰ Amara kalikame lokere bino riamo kede genere; poore bino motere di kinotere kede mulem.

¹¹ Genere kame jo tie kede bino tuno malo di yai ki lobo, di Rubanga ngat kopoore ko bino neno piny ki malo.

¹² Rwot bino mino wa gikame ber, di lobo wa ko bino kelo ne wa amio.

¹³ Poore bino telo ne Rwot yongayo di eko iiko ne kabeo.