Sabuli 84 - Baibuli I Leb Kumam 2013

Wer me Dano kame tie Paro Ot ka Rubanga

¹ Kakame in ibedo iye tin ber benyo, Okwe Rwot me jo yi!

² Cunya mito, ateteni eparo kitek pi bedo i diakal ka Rwot; ango awero kede cunya kede koma dedede but Rubanga kame kuo pien atie kede kilel.

³ Kiton omobilo da tie kede ude, doko acilagwec da gero ude gi, kakame kinywalo iye idwe gi, i alutari nin, Okwe Rwot me jo yi, Abaka na kede Rubanga na.

⁴ Kitie kede yomcuny gin jo kame kibedo i odi, di kibedo wero were me paki nakanaka.

⁵ Kitie kede yomcuny gin jo kame kiudo teko gi kibuti, jo kame cuny gi mito ot wori i Sion.

⁶ Ka gin kitie beo ki aditot me Baka, gin kimie edoko kabedo me ataneko; kot kame geo cwei da mio pii pong iye.

⁷ Teko gi meede ameda kame gin kitie ot; gin kibino neno i Sion Rubanga kame kalamo rubangan dedede.

⁸ Okwe Rubanga me jo yi, winy ilega na; cik yiti iwinyi, Okwe Rubanga ka Yakobo!

⁹ Neningo, Okwe Rubanga in ngat kame ibedo ebuku wa; nen kede kisa dano nin kame itieko yero.

¹⁰ Pien bedo i diakal nin ceng acel kenekene ber kalamo ceng tutumia acel kame dano bedo kede kabedo ace. Eber nango bedo ngadar ekeko me ot ka Rubanga kalamo ot bedo i miere me jo areco.

¹¹ Pien Rwot Rubanga tie bala ceng kede ebuku wa; en etimo ne wa bero doko emio wa deyo. Likame tie gimoro aber kame Rwot twono jo kame timo gi kopoore.

¹² Okwe Rwot me jo yi, kitie kede yomcuny jo kame geni.