Sabuli 80 - Baibuli I Leb Kumam 2013

Ilega me Kwano Rubanga Dwoko Bero me Isirael

¹ Winy koko wa, Okwe ngakwat me Isirael, in ngat kame itelo ikwae ka Yakobo bala romini. In ngat kame ibedo i kom ni me ajakanut i ngei cerubim,

² poore inyutere but atekerin ka Epuraimu, ka Benjamin kede me ka Manase. Nyut twer nin, di iko bino ilak wa!

³ Mi wa odok cal bala ngoce, Okwe Rubanga; mi kisa maki i kom wa, tetekeny oud alako.

⁴ Okwe Rwot Rubanga me jo yi, ibino bedo ger iko dagi winyo ilega me jo ni pi kare arom amene?

⁵ In itieko mino wa ocamo pigewang wa bala kwon, doko itieko mino wa omato pigewang wa atot.

⁶ In imio atekerin apat kame kio kede wa obedo kede acae i kom wa; jokwor wa do nyero wa ken gi ken gi.

⁷ Mi wa odok cal bala ngoce, Okwe Rubanga me jo yi; mi kisa maki i kom wa, tetekeny oud alako.

⁸ In riki ikelo jo ni ki Misiri bala olok; iriamo atekerin apat di iko pite.

⁹ In iko iiko ne poto kiber; aliasin mege oko donyo kakatut eko nyai eromo lobo nono.

¹⁰ Tipo mere oko umo mori, ajange mege oko walo twon yen adongodongo kame kolwongo be seda.

¹¹ Eyaro ajange mege paka tuno i nam adwong, kede aliasin mege oko riere paka i ecilet.

¹² Do kara doko pinyo komio in iko reto apama kame kocele kede, omio jo dedede kame beo i ngete ngwedo anyakini mege?

¹³ Ipegei me itela nyonyono en, doko da leini dedede me obar came.

¹⁴ Lokere bobo but wa, Okwe Rubanga me jo yi, ngoloro piny ki malo di iko neno; par pi olok noni,

¹⁵ en yat olok kame cingi opito.

¹⁶ Gin kitieko wange kede mac, kitonge piny; mi neeno ni me gero nekaro gi.

¹⁷ Do ket cingi me gwok i kom jo kame in iyero, jo kame in imio obedo tek pirin.

¹⁸ Di do wan likame oko bino lokere tenge kibuti; mi wa obed kuo, di wan oko bino pako nyingi.

¹⁹ Mi wa odok cal bala ngoce, Okwe Rwot Rubanga me jo yi; mi kisa maki i kom wa, tetekeny oud alako.