Sabuli 77 - Baibuli I Leb Kumam 2013

Kweicuny i Kare me Peko

¹ Ango akok kede dwan amalo but Rubanga, akok kede dwan amalo but Rubanga, me wek ewiny koko na.

² Ango amo Rwot i kare kame atie kede i peko; ango atango cinga bute iwor kiakia abongo jony; do likame tie gikame twero kweno cunya.

³ Ango aparo kop i kom Rubanga di acur; aparere i kome di cunya ko kwanyere.

⁴ In igenga nino; atie kede peko adwong kame mia likame atwero yamo.

⁵ Aparo kop i kom kare kokato, ako yutuno mwakini ariki sek.

⁶ Cunya tie kede par iwor kiakia; aparere di ako penyere i cunya be:

⁷ “Benyo, Rwot bino dagi wa nakanaka? Likame kisa bino make i kom wa?

⁸ Benyo, amara mere kalikame lokere ojik do atwal? Mam do cikere kame en ecikere kede but wa ojik atwal?

⁹ Mam wi Rubanga owil timo wa kisa? Mam do elunyo bedo kede gero akaka mwolo?”

¹⁰ Di ango ako waco be, “Gikame wango cunya twatwal en ine be, twer kame Ngamalo Twal oudo tie kede otieko lokere.”

¹¹ Ango abino yutuno tice ka Rwot; abino yutuno giaura kame in itimo i kare kasek.

¹² Abino paro i cunya tice nin dedede, doko cunya bino paro tice nin me twer.

¹³ Gi dedede kame in itimo, Okwe Rubanga, obedo gikacil; rubanga mene en kame dwong bala Rubanga wa?

¹⁴ In en Rubanga kame timo giaura; in itieko nyuto twer nin i diere me atekerin.

¹⁵ In ilako jo nin kede twer nin, jo kame obedo ikwae ka Yakobo kede me ka Yosepu.

¹⁶ Kakame pii oneni kede, Okwe Rubanga, kakame pii oneni kede, lworo oko mako gi, pii atut me nam oko cako tagere bala dano kame tie kede mielkom pi lworo.

¹⁷ Idoun onyo kot piny; malo obedo tie kede amwocumwocun bala me kot; meny bala me kot oko caro piny dedede.

¹⁸ Mor me dwani bala amwocumwocun me kot oudo tie i apipiru; meny nin oko caro piny dedede; lobo oko ayayangun bala dano kame tie kede mielkom.

¹⁹ Yongayo nin obeo ki dier nam adwong; in ingolo twon pii atot twatwal, do kakame tieni onyono likame onenere.

²⁰ In itelo jo ni itero gi bala romini, di itio i cing Musa kede Aaron.