Sabuli 75 - Baibuli I Leb Kumam 2013

Rubanga Ngangolkop

¹ Wan opwoi, Okwe Rubanga, wan opwoi; in itie iyapiyapi. Jo tatamo tice nin me aura.

² Rubanga waco be, “I kare kopoore kame ango atieko moko abino ngolo kop kakare.

³ Kame lobo otagere karacel kede jo dedede kame bedo iye, ango en kame amio ipirin mege cungo di tek.

⁴ Ango atie waco ne jo awakere be kiwek ewaka; kede ne jo areco be kiwek suk.

⁵ Kur isukunu, arabo yamo di ngutu opong.”

⁶ Ngolo kop likame wok ki tetu kide arabo ki tetu tim, likame ki tetu malo arabo ki tetu piny;

⁷ do Rubanga en kame ngolo kop, engolo ne jo mogo kop be kireco do mogo engolo negi kop kame gonyo gi.

⁸ Pien ikopo me bwini akuao tie i cing Rwot, bwini kame konyalo di kec kame obedo gero mere; en ebino mino jo areco kame tie i lobo mate, tuno tieke pitipit.

⁹ Do ango abino kilel nakanaka; abino wero wer me pako Rubanga ka Yakobo.

¹⁰ En ebino tuturo teko me jo areco, di eko bino medo teko ne jo kopoore.