Sabuli 73 - Baibuli I Leb Kumam 2013

ITABU ME ADEK Sabuli 73—89 Rubanga Ngolo Kop i Ateni

¹ Ateteni Rubanga ber but jo opoore, but jo kame cuny gi cil.

² Do ango tiena oudo obuco acetar; abuco cer,

³ pien oudo nyeko maka kede joewaka, i kare kame aneno kede di gi dedede tie kiber ne jo areco.

⁴ Pien likame gin kitie kede aramo moro; kom gi yot di pwot.

⁵ Gin likame kitie i peko bala jo apat; gin likame kineno can bala jo apat.

⁶ Manoni omio gin kingapo ewaka bala eriko me ngut; tim me gero oumo gi pukupuk bala egoe.

⁷ Kicwe mo odedengo wang gi; tam areco opong i cuny gi.

⁸ Gin kiyamo kope me acae kede kope areco i kom jo; kititimo jo di kiwakere kede kope me adiadia.

⁹ Dog gi yamo kope areco i kom Rubanga kame tie i malo, doko leb gi da likame weko yamo kop i kom jo me wi lobo.

¹⁰ Manono omio jo olokere pako gin, di likame kiudo raco moro i kom gi.

¹¹ Gin kiwaco be, “Rubanga twero ngeno benyo benyo? Ngamalo Twal karuno bedo kede ngec nyo iye?”

¹² Manono en gikame jo areco waco; gin kitie i kuo ayoyot, doko abar meede negi ameda.

¹³ Abedo gwoko cunya di cil me nono, di abedo abongo raco moro.

¹⁴ Pien kobedo mina neno can piny yuluyul, doko komia alola buli odiko acelacel.

¹⁵ Ka koto oudo awaco be, “Abino yamo bala gin,” koto oudo likame abedo kede ateni but jo ni.

¹⁶ Do kakame atamo kede pi niang gi noni, ako udo be ebedo gikame niang tek na,

¹⁷ tuno kede kakame ango ako ot kede i kabedo kacil ka Rubanga; di do ako niang gikame bino timere ne jo areco nogo.

¹⁸ Ateteni in iketo gi kakapwot, manoni mio gi kipopoto.

¹⁹ Gin komuducaro gi abongo gal, can kame kelo lworo wearo gi pitipit.

²⁰ Gin kical bala lek arwenyo ka dano ocei ki nino; ka in iyai, Okwe Rwot, gin kirwenyo.

²¹ Kakame cunya odoko kede kec, kakame abedo kede cwercuny

²² oudo amiming, doko oudo akwia piny; oudo acal bala le ager atie i nyimi.

²³ Do akadi kamanono da, ango atie kede in nakanaka; in imako cinga tetu cam.

²⁴ In imia tam kame tela, di i cen mere iko gama kede wor.

²⁵ Ngai apat kame tie pira i malo kwanyo in? Doko da likame tie gimoro i lobo kan kame cunyango tie iye apat kede in.

²⁶ Koma kede cunya twero doko goro, do Rubanga en kame mio cunya teko, en mera ikar kede ikar.

²⁷ Ateteni jo kame bor kedi bino to; in ibino jiko kuo me jo kalikame tie kede ateni buti.

²⁸ Do kibuta, eber na pi bedo iyapiyapi kede Rubanga, pi mino Rwot Rubanga doko karingo na, kede pi tatamo tice mege dedede.