Sabuli 71 - Baibuli I Leb Kumam 2013

Ilega me Dano Oti

¹ Ango aringini gwokere buti, Okwe Rwot; kur imi lewic maka.

² Laka doko marao ango pien in ipoore; cik yiti iwiny kwac na di iko laka.

³ Bed lela na kame ango aringo ot gwokere iye, kede apama atek pi laka, pien in en lela nango kede apama atek kame gwoka.

⁴ Okwe Rubanga na, laka ki cing jo areco, laka ki cing jo kame li kede ateni doko di kiger.

⁵ Pien in en gen nango, Okwe Rwot, abedo geni cako di ango pwodi eponga.

⁶ Cako nywala, ango agangere buti; in en kame bin iwota ki yi toto na. Ango abino paki nakanaka.

⁷ Ango atieko bedo bala anen but jo atot, do in en kakatek kame ango aringo ot gwokere iye.

⁸ Doga paki nakanaka, doko emi deyo piny yuluyul.

⁹ Kur iuca tenge i kare me tio na; kur ijala i kare kame do teko na otiek kede.

¹⁰ Pien jokwor na yamo kop i koma, doko jo kame mito kwanyo kuo na poro kop i koma karacel.

¹¹ Gin kiwaco be, “Riamunu ikounu mako ngat kame Rubanga otieko weko no, pien ngat kame bino lake li.”

¹² Okwe Rubanga, kur ibed bor keda; Okwe Rubanga na, susunyo bino konya!

¹³ Mi lewic mak jo kame waco na raco, doko muducaro gi; mi jo kame mito timo na raco ud acae kede lewic.

¹⁴ Do ango abino meede ameda bedo kede gen buti, doko abino meede kede paki nakanaka.

¹⁵ Doga bino tatamo tice nin kopoore, ebino tatamo piny yuluyul tice nin kame ilako kede jo, akadi bed bala kitot kikalamo ngec nango.

¹⁶ Abino bino di atatamo tice me twer ka Rwot Rubanga, abino tatamo poore nin, meri kenekene.

¹⁷ Okwe Rubanga, in ibedo pwonya cako di pwodi ango atie eponga, doko da ango pwodi atie tatamo tice me aura kame in itimo.

¹⁸ Pi mano, akadi ati di do lwar omaka, Okwe Rubanga, kur ijala, tuno kede ka atieko tatamo twer nin but lwak dedede me kare me anyim.

¹⁹ Poore nin, Okwe Rubanga, tuno malo kakawiriwir. In itieko timo jamini adongodongo, Okwe Rubanga, kara ngai kame cal bala in?

²⁰ In ngat kame imia aneno peko kede can atot, ibino bobo dwoko na teko; ibino wota ki bur atut i lobo.

²¹ In ibino medo dwongo na, di iko kweno cunya bobo.

²² Abino paki kede adungu pien in igenere, Okwe Rubanga na; abino wero were me paki di agoo adungu, Okwe in Ngat Kacil me Isirael.

²³ Doga bino lelemo pi ilel kame atie wero were me paki; kuo na kame in itieko lako da bino paki.

²⁴ Leba bino yamo kony kame in imia pi poore nin piny yuluyul, pien kotieko mino jo kame oudo mito timo na raco lewic kede acae.