Biblia Todo Logo
Bìoball air-loidhne

- Sanasan -

Sabuli 69 - Baibuli I Leb Kumam 2013


Koko me Kwano Kony

1 Okwe Rubanga, laka, pien pii do otieko tuno i nguta.

2 Atie lwiny i cwoto atut, kakame kacungo li kiye; atieko tuno i pii atut, pii amol do dipere beo i wia.

3 Aol kede koko; dwana otuo. Wanga da do odoko col pi kuro Rubanga na.

4 Jo kame daga nono nono abongo kop moro tot kalamo wel me yer wia; jo kame mito neka tot, gin jokwor na kame cuko na kop. Benyo, mam ango miero nan adwok gi kalikame akwalo?

5 Okwe Rubanga, in ingeo mingo nango; dub kame ango atimo, likame okanere kibuti.

6 Pi ango, kur imi lewic mak jo kame geni, Okwe Rwot Rubanga me jo yi; kur imi cai jo kame moi pi ango, Okwe Rubanga me Isirael!

7 Ango abedo kanyo ayet piri, lewic otieko pong i wia.

8 Atieko doko bala dano apat i diere me joawade na, ngakumbor i but idwe ka toto na.

9 Nyeko na me amara pi odi liel i cunya bala mac; ayet kame jo yeti kede opoto i koma.

10 Kakame bin amwolere kede di akanyo kec, jo oko yeyeto ango pi timo kamanono.

11 Kakame angapo kede egoe me iturur, ako doko gi me ayama gi.

12 Ango adoko gi me akwota kibut jo kame bedo i erute, doko joamera da teto were i koma.

13 Do ango gira akelo kwac na buti, Okwe Rwot. Okwe Rwot, pi amara nin adwong kalikame lokere, gam koko na i kare kame poore. Pi kony nin kame genere

14 laka kur alwiny i cwoto; laka ki cing jokwor na kede ki pii atut.

15 Kur iwek pii amol dipere bei iwia, arabo kakatut lwinya, amoto ates mwonya.

16 Gam kwac na, Okwe Rwot, pien amara nin kalikame lokere ber; lokere buta pi cuny me kisa nin adwong.

17 Kur ilok wangi tenge kibut ngatic nin, pien atie i can, susunyo gamo kwac na.

18 Nyikini di iyapiyapi keda, laka, laka ki cing jokwor na.

19 In ingeo kite kame koyeyeto ango kede, kede lewic kede acae kame audo; in ingeo jokwor nango dedede.

20 Ayet otieko dubo cunya, omio do ali kede gen. Oudo amo ngatamoro be amoto koto kisa omake i koma do likame ako udo; doko amo ngat kame koto kwei cunya, do likame ako udo.

21 Akaka mina cam gin kimia poison, doko di orio oudo oneka, gin kimia bwini awac pi mato.

22 Mi ebaga gi lokere dok obek me mako gi, mie edok bala owic ne jo kame gango gi.

23 Mi wang gi dok col tetekeny kur kikaruno neno piny, doko mi pier gi bed di ogom nakanaka.

24 Nyut gero ni i kom gi; pi gero nin aliet, riam gi paka mako gi.

25 Mi miere gi dong nono abongo jo; kur imi ngatamoro dong i kimere gi.

26 Pien gin kitidilo jo kame in itieko keto can i kom gi, doko pwodi kimeede suro jo kame in itieko mino awanon.

27 Meede ameda maro raco gi i wi raco; kur iwek gi aweka ki raco go.

28 Kwany nying gi tenge ki itabu me jo akuo; kur imi rwak nying gi i kom nying jo kopoore.

29 Do ango atie neno can doko atie kede lito; Okwe Rubanga, laka iko tinga malo.

30 Ango abino pako nying Rubanga kede wer; abino mine dwongo kede pwoc.

31 Manoni bino yomo cuny Rwot kalamo mine etobait, kalamo akadi mine twon ati kame tie kede tunge kede abelekek.

32 Mi jo kame kotie tero kirac nen manono di cuny gi ko bedo yom; wun jo kame imounu Rubanga, miunu cunyu dwogi.

33 Pien Rwot winyo koko me jocan, doko likame ecao jo mege kame kotweo.

34 Wek malo kede piny pake, name kede gi dedede kame kuo kame tie i yi gi da pake.

35 Pien Rubanga bino lako Sion di eko bobo medo gero bomban me Yuda; di jo mege ko bino bedo kuno, di kanono ko doko mergi;

36 ebino doko me idwe ka jotic mege, doko jo kame mare bino bedo iye.

Baibuli I Leb Kumam © Bible Society of Uganda, 2013.

Bible Society of Uganda
Lean sinn:



Sanasan