Sabuli 68 - Baibuli I Leb Kumam 2013

Wer me Ikuk Kame Piny moro Olo Yi

¹ Rubanga, yai di jokwor ni ko sasarun; miero jo kame dagi bwangere ringo tenge ki nyimi.

² Bala kame yamo buko kede yiro duny eoto tenge, riam gi tenge iepone nono; bala kame odok calar kede i mac, miero jo areco muducar i nyim Rubanga iepone nono.

³ Do jo kopoore miero leli; miero kilel i nyim Rubanga; miero kitaci kede kilel.

⁴ Werunu ne Rubanga, werunu were me pako nyinge; iikunu yongayo ne en ngat kame eoto kede asigira i wi idoun, nyinge Rwot, lelunu i nyime.

⁵ Rubanga kame bedo kabedo mere kacil en papa me idwe kic doko en egwoko apuserun.

⁶ Rubanga mio ngacan kame tie kene paco kame ebedo iye; en ewoto mabus ki otkol di eko mino gi kibedo i mulem, do jo kame jemo nen bino bedo i lobo kotuo.

⁷ Okwe Rubanga, i kare kame in bin itelo kede jo ni, kakame kibeo kede i wi tim,

⁸ piny oko yangere, kot oko ony ki malo pi tie nin, in Rubanga kame bin oyamo i moru me Sinai, pi tie nin, in Rubanga me Isirael.

⁹ Okwe Rubanga, in bin imio kot ocwei di tot; di iko temuno lobo nin kame oudo otieko ti;

¹⁰ en eko doko kabedo me jo nin; Okwe Rubanga, pi bero nin omio iko konyo jocan.

¹¹ Rwot bin omio cik, di mon atot oko tero rwonge be,

¹² “Abakai kede isirikalen gi tie ringo tenge, kitie ringo!” Mon kame odong imiere tie popoko jamini kame koyako,

¹³ akadi jo kame odong i anok me romini da bino udo cal me awele kame nyonyo siliba oumo kome lung, di saabu acil meny ki bwome.

¹⁴ Kakame Won Twer osasaro kede abakai i wi moru me Salmon, oudo ineno do bala akako tie cwei kuno.

¹⁵ Okwe moru me twer, moru me Basan; Okwe moru kame wie tot atota, moru me Basan!

¹⁶ Okwe moru kame wie tot atota, pinyo bo komio in ineno kede nyeko moru kame Rubanga oyero pi bedo kabedo mere, kakame Rwot bino bedo iye nakanaka?

¹⁷ Rwot wok ki Sinai ebino kabedo kacil, ebino kede cabalan tutumian kede tutumian.

¹⁸ En eko ot malo i wi moru abor nono, di etero jo atot kame emako ki yi; en egamo giamia kibut jo, akadi kiton kibut jo kame dagi ne Rwot Rubanga bedo kuno.

¹⁹ Opakunu Rwot, ngat kame yeo peko wa buli ceng; Rubanga en ngalak wa.

²⁰ Rubanga wa en Rubanga kame lako wa, en Rubanga, Rwot wa, ngat kame mio wa obwot ki to.

²¹ Do Rubanga bino nyonyoto wi jokwor mege, jo kame yer wi gi oduko, jo kame timo tim areco.

²² Rwot owaco be, “Ango abino dwoko gi ki Basan; abino dwoko gi ki dud nam atut,

²³ tetekeny wun iotunu di inyonunu remo gi, di igwogin wu da ko bino udo iner gi, en nango remo me jokwor wu.”

²⁴ Okwe Rubanga, jo dedede otieko neno jwiao nin kede jo, jwiao ka Rubanga na kede jo, en abaka na, di eoto donyo i kabedo kacil.

²⁵ Jo awero telo yongayo, jo agoo adungu di lubo gi ki cen, i dierediere gi tie iye anyira kame yeko ayekeyeke.

²⁶ Gin oudo kilelemo be, “Pakunu Rubanga i kacokere adwong me jo mege, en Rwot, Okwe wun ikwae me Isirael!”

²⁷ Benjamin kame oudo titidi kikom gin dedede en kame oudo telo gi, jotel me Yuda di lubo kede ekodet gi, di do jotel me Sebulun kede Naputali.

²⁸ Nyut twer nin, Okwe Rubanga; nyut teko nin, Okwe Rubanga, bala kame oudo itieko timo ne wa kede sek,

²⁹ i tempulo nin kame tie Yerusalem kakame abakai kelo nin iye giamia.

³⁰ Bunano Misiri, en le kame bedo i aladoi, en ekodet me twonin kede roce me atekerin apat, tuno ka gin kiriebere piny i nyimi di kiko culo esolo gin kede nyonyo siliba. Sasaro jo kame cuny gi maro yi.

³¹ Joor kame cungo ne pinye gi bino wok ki Misiri; jo me Abisinia bino tingo cing gi malo lego Rubanga.

³² Werunu ne Rubanga, Okwe wun abakai me lobo; werunu were me pako Rwot,

³³ werunu ne en ngat kame eoto i malo, malo kasek; winyunu, en eredo kede dwan amalo.

³⁴ Wacunu be twer obedo me ka Rubanga, ngat kame dwongo mere tie i kom Isirael, twer mere tie i idoun.

³⁵ Etie gi me lworo pi neno Rubanga di wok ki kabedo mere kacil, Rubanga me Isirael; en emio twer kede teko but jo mege. Pak bed but Rubanga!