Sabuli 62 - Baibuli I Leb Kumam 2013

Gen i kom Gwok ka Rubanga

¹ Ango abedo mot di akuro Rubanga kene; alako nango wok kibute.

² En kene ebedo lela na kede ngat kame laka; en etie bala apama atek kame gwoka, likame tie gimoro kame bino yangaro ango.

³ Ibinunu bedo suro dano pi kare kame rom kamene, mam wun dedede ibinunu bunge bala bungo apama kame mito poto, bala cel ayagayaga.

⁴ Gin kenekene kitimo iik me reto dano ki ruom mere. Cuny gin yom i kom kop me angalo; kilamo ne jo winyo kede dog gi, do di i cuny gi kilamo gi kirac.

⁵ Ango abedo mot di akuro Rubanga kene, pien gen nango tie bute.

⁶ En kene ebedo lela na kede ngat kame laka; en etie bala apama atek kame gwoka, likame tie gimoro kame bino yangaro ango.

⁷ Alako kede wor nango yai kibut Rubanga; en lela na atek, ango aringo ot gwokere but Rubanga.

⁸ Genenu i kare dedede, Okwe wun jo na; wacenu kop me cunyu dedede; Rubanga en ngat kame wan oringo ot gwokere bute.

⁹ Jo me ruom apiny cal bala yamo abuko, jo me ruom amalo da kony gi li; kame kopimo gin dedede karacel i misani, kiwelewele; kiwelewele kalamo yamo.

¹⁰ Kur iket gen ni i amao, doko kur iket gen ni i tic me yak, pien likame tie gikame in iudo kiye; ka abar nin onyai, kur iket cunyi i kom gi.

¹¹ Rubanga otieko yamo kicel be, twer obedo mere. doko en etieko yamo kalamo kano be,

¹² amara mere likame lokere. Pien in, Okwe Rwot, iculo jo dedede di lubere kede gikame gin kitimo.