Sabuli 6 - Baibuli I Leb Kumam 2013

Ilega me Kwano Kony i Kare me Peko

¹ Okwe Rwot, kur ibunano ango pi gero ni, kur ibitaro ango pi lilo ni.

² Kisa maki i koma, Okwe Rwot, pien atieko doko goro; Okwe Rwot, canga, pien cogere na li do kede teko atwal.

³ Peko otieko donyo i kuo na, do in, Okwe Rwot, ibino daro paka awene?

⁴ Okwe Rwot, lokere buta iko lako kuo na; laka pi amara ni kalikame lokere.

⁵ Pien likame koyutuno in i kabedo me jo oto; ngai kame paki i kabedo me jo oto?

⁶ Cur otieko oola; iwor acelacel pigewanga nyongo kabuto; koko mio pigewanga nyongo kawic diabadiaba.

⁷ Koko omio wanga opongupongun, kitie doko mwadamwada pien akok pi jokwor na.

⁸ Irwaunu tenge kibuta wun jo dedede kame timo gikareco, pien Rwot otieko winyo koko na.

⁹ Rwot otieko winyo kwac na; Rwot gamo ilega na.

¹⁰ Lewic bino mako jokwor na dedede di kiko bedo kede peko; gin kibino wilun dok di oko bino mino gi lewic susunyo.