Sabuli 59 - Baibuli I Leb Kumam 2013

Ilega me Kwano Gwok

¹ Laka ki cing jokwor na, Okwe Rubanga na; gwoka kibut jo kame tie timo kolo i koma.

² Laka ki cing jo kame timo tim areco; laka ki cing jo kame cuny gi kukudo gi pi onyo remo.

³ Neni, gin nan kipwono kitie kura pi neka; jo atek tie cokere cako yi keda. Likame be pien aturo iswil arabo pi dub na moro, Okwe Rwot,

⁴ doko da likame pi raco na moro en komio gin kitie ringo ot iikere pi sura.

⁵ Yai ibin ikonya iko bino neno kede wangi, in Rwot Rubanga me jo yi, Rubanga me Isirael. Yai iko mino atekerin apat dedede alola; kur iwek ngatamoro kikom joerupe kame timo tim areco.

⁶ Otieno acelacel gin kidwogo di kicelakino bala igwogin, kede di kiririmo bomba.

⁷ Winyunu kong kope kame dog gi tie bwoto! Kope kame wok ki dog gi bit bala epima, pien gin kiwaco be, “Ngai kame twero winyo kope wa?”

⁸ Do in giri inyero gi anyera, Okwe Rwot; in inyero atekerin dedede nyero me acae.

⁹ In ibedo teko na, abino ciko wanga i komi; pien in, Okwe Rubanga, itie bala apama atek kame gwoka.

¹⁰ Rubanga na bino bino buta pi amara mere kalikame lokere; en ebino mina aneno jokwor na di kotieko bwono gi.

¹¹ Kur inek gi, pien wi jo na bino wil; do pi twer nin, mi gi kidok jo kame rimo piny atatai, iko dwoko gi piny, Okwe Rwot, ngagwok wa.

¹² Mi mak gi i ewaka gi, pien kope me dog gi obedo me dub, gimoro dedede kame gin kiwaco obedo me dub! Pi lamo jo kede pi yamo kope me abe,

¹³ dok ger iko muducaro gi; muducaro gi atwal atwala. Di jo ko bino ngeno be, Rubanga pugo Isirael kede wi lobo lung.

¹⁴ Otieno acelacel gin kidwogo di kicelakino bala igwogin, kede di kiririmo bomba.

¹⁵ Gin kiko donyo ririmo bomba mono cam, do ka gin likame kiyeng kiko donyo ngururo.

¹⁶ Do ango abino wer pi pako teko ni; odiko abino wer kede dwan amalo pi pako amara ni kalikame lokere. Pien in itie bala apama atek kame gwoka, kede karingo na i kare na me peko.

¹⁷ Okwe, in ibedo teko na, abino wero wer me paki, pien in itie bala apama atek kame gwoka; in en Rubanga ngat kame nyuto na amara kalikame lokere.