Sabuli 57 - Baibuli I Leb Kumam 2013

Ilega me Kwano Kony

¹ Mi kisa maki i koma, Okwe Rubanga, mi kisa maki i koma, pien in en karingo me gwok na; abino ringini gwok i tipo me bwomi, paka tuno di yamo kame buko di ger otieko kato.

² Akok but Rubanga Ngamalo Twal, but Rubanga ngat kame cobo iik mere pira.

³ En ebino cwano kony ki malo eko laka; en ebino mino lewic mako jo kame tie nyonyono ango. Rubanga bino nyuto na amara mere kalikame lokere kede genere mere.

⁴ Ango atie buto piny i diere me inguon, inguon kowor icamo ringo me jo; lak gi cal bala leb tongini kede leb imalia, leb gi cal bala ipimai abit.

⁵ Nyut dwongo nin i malo, Okwe Rubanga; mi deyo nin rom wi lobo lung.

⁶ Gin kiciko bwoi pi mako tiena; cwercuny obwono kuo na. Kikunyo bur i yongayo na, do gin en kame kiko lokere popoto iye.

⁷ Cunya omoko i komi, Okwe Rubanga, cunya otieko moko i komi. Abino wero ni wer kede dwan amit.

⁸ Cei, in kuo na! Ceunu, wun adungu kede arigirigi na! Ango abino cei di pwodi piny obai.

⁹ Abino mini pwoc, Okwe Rwot, i diere me jo apat; abino wero wer me paki i diere me atekerin.

¹⁰ Pien amara ni kalikame lokere dwong tuno i malo; genere nin dwong tuno i idoun.

¹¹ Nyut dwongo ni i malo, Okwe Rubanga, mi deyo ni rom wi lobo lung.