Sabuli 56 - Baibuli I Leb Kumam 2013

Ilega me Geno Rubanga

¹ Bed kede kisa i koma, Okwe Rubanga, pien jo tie tidilo ango; jokwor na tie timo na raco kare dedede.

² Jokwor na tidilo ango piny yuluyul, pien jo atot tie yi keda.

³ Ka ango atie kede lworo, Okwe Rubanga Ngamalo Twal, ango aketo gen na buti.

⁴ Ango aketo gen na i kom Rubanga di likame ako bedo kede lworo; ango apake pi cikere mere; dano adana twero timo nango nyo?

⁵ Gin kimoo epone me loko kope na piny yuluyul, tam dedede kame kitie kede i koma tie me timo na raco.

⁶ Gin kicokere karacel di kidapidapitoi; gin kikia pi neno kabeo na, di kimito neka.

⁷ Aso, mi gi alola pi tim gi areco, rereto jo nogi piny pi lilo ni, Okwe Rubanga.

⁸ In ibedo maro wel me peko na; ket pigewanga i cupa nin. Mam in iwandiko gi i itabu nin?

⁹ Manoni bino mino jokwor na wilun dok cen i ceng kame ango abino kok kede buti. Ango angeo be Rubanga tie i bad na,

¹⁰ en Rubanga ngat kame ango apwoyo cikere mere, en Rwot ngat kame ango apwoyo cikere mere.

¹¹ Ango aketo gen na but Rubanga; likame abino bedo kede lworo. Dano adana twero timo nango nyo?

¹² Miero anen be acobo kwongere na kame atimo buti, Okwe Rubanga. Abino mini giamia me pwoc.

¹³ Pien in ilako kuo na ki to, kede igwoko tiena likame apoto, tetekeny aoti ki nyimi in Rubanga, ki lero kame mio kuo.