Sabuli 54 - Baibuli I Leb Kumam 2013Ilega me Kwano Gwok ki Cing Jokwor 1 Okwe Rubanga, laka pi nyingi; gonya abed abongo raco moro pi twer nin. 2 Winyi ilega na, Okwe Rubanga; cik yiti iwiny kop kame wok ki doga. 3 Pien jo asuk obwangere i koma, jogero tie mito neka; gin likame kiparo pi Rubanga. 4 Do ateteni Rubanga en ngakony nango; Rwot en ngat kame gwoko kuo na. 5 En ebino timo onyanga i kom jokwor na pi raco kame gin kitimo. In muducaro gi pien in igenere. 6 Abino mini giayala kame cunya owinyo pi kwanyo; abino mini pwoc, Okwe Rwot, piento in iber. 7 Piento in itieko laka ki peko dedede, di wanga oko neno di abwono jokwor na. |
Baibuli I Leb Kumam © Bible Society of Uganda, 2013.
Bible Society of Uganda