Sabuli 53 - Baibuli I Leb Kumam 2013

Tim Areco ka Dano

¹ Jomingo waco i cuny gi be, “Rubanga likame tie.” Gin dedede kitieko dubere, kitimo gi me kwer, likame tie ngatamoro kame timo gikaber.

² Rubanga ngio jo ki malo, pi neno ka tie ngatamoro kame riek, ngat kame mo Rubanga.

³ Gin dedede kitieko parao, gin dedede kitieko dubere; likame tie ngatamoro kame timo gikame ber, likame tie akadi acel.

⁴ Mam gin likame kitie kede ngec moro, gin jo kame timo gikareco, jo kame camo jo na bala kwon di likame kilego buta?

⁵ Ki kuno gin kibino bedo kede lworo, twon lworo kalikame pwodi lem omako gi. Pien Rubanga bino sasaro cogere me jokwor ka jo mege; kobino mino lewic mako gi, pien Rubanga otieko dagi gi.

⁶ Okwe koto alako me Isirael owok ki Sion! I kare kame Rwot dwoko kede winyo ne jo mege, ikwae ka Yakobo bino ilel; jo me Isirael cuny gi bino bedo yom.