Sabuli 52 - Baibuli I Leb Kumam 2013

Ngolo Kop kede Kisa ka Rubanga

¹ Pinyo komio iwakere, Okwe in ngateko, pi raco kame itimo ne jo kame woro Rubanga? Piny yuluyul

² in itie timo iik me nek. Lebi cal bala liedi abit, in ngatet kope me abe i kom jo.

³ In imaro gikarac kalamo gikame ber, doko imaro yamo kope me abe kalamo yamo kope me ateni.

⁴ In imaro yamo kope kame dudubo, Okwe in leb kame yamo kope me abe!

⁵ Do Rubanga bino turi piny atwal; ebino waraso in ki kima ni di eko nyinyilo in; ebino puti tenge ki lobo me jo akuo.

⁶ Jo opoore bino neno di kiko bedo kede lworo; kibino nyero ngatim raco di kiwaco be,

⁷ “Nenunu ngat kame oudo likame mito ot gwokere but Rubanga, do eko lunyo keto gen mere i kom twon abar mere, di eko mito gwokere i abar.”

⁸ Do ango acal bala yat olibeti kame tie i ot ka Rubanga. Ango ageno amara kalikame lokere ka Rubanga ikar kede ikar.

⁹ Ango abino pwoni nakanaka pi gikame itimo; abino tuco nyingi i nyim jo kame geni, pien eber.