Sabuli 51 - Baibuli I Leb Kumam 2013

Ilega me Kwano Isasir

¹ Mi kisa maki i koma, Okwe Rwot, pi amara ni kalikame lokere. Wei tenge gikareco na pi cuny nin me kisa adwong.

² Lwoka kiber ki gikareco na, iko lonya ki dub na.

³ Pien ango angeo gikareco na, doko dub na tie i tam na nakanaka.

⁴ Ango atieko dubo buti, butin kenekene, doko ako timo gikame rac i wangi. Man omio ka iwaco na raco udo kop nin tie kakare, doko da ili kede raco moro ka ingolo kop oloa.

⁵ Ateteni konywala di atie kede raco, abedo ngadubo cako esawa kame toto na oyaca kede.

⁶ In imito cuny kame tie kede ateni; pi mano, pwony cunya me diere i rieko.

⁷ Lonya ki dub na di ako doko cil, lwoka di ako bedo tar kalamo akako.

⁸ Mia awiny kope kame kelo na ilel kede yomcuny; mi cogere kame itieko tuturo leli.

⁹ Lok wangi tenge kur inen dub na, di iko weno tenge gikareco na.

¹⁰ Cwei na cuny acil, Okwe Rubanga, iko mina abed kede cuny anyen kopoore.

¹¹ Kur iriama tenge ki nyimi, doko da kur ikwany tipo ni kacil kibuta.

¹² Dwok na ilel kame alako ni kelo, iko mina cuny me bedo kede wor buti.

¹³ Ango di do ako bino pwonyo jo areco yote nin, di jodubo ko bino dwogo buti.

¹⁴ Laka kur ony remo na, Okwe Rubanga, in Rubanga ngat kame laka, di leba ko bino wero kede dwan amalo kop i kom alako nin.

¹⁵ Okwe Rwot, yab doga, di ako bino paki.

¹⁶ Pien likame cunyi mito giayala; akadi di koto oudo ami giamia awanga, likame oudo atwero yomo cunyi.

¹⁷ Giamia kame Rubanga gamo en cuny kame turere; Okwe Rubanga, in likame idagi cuny kame turere kede kame swilaro.

¹⁸ Tim ne Sion bero pi bercunyi; ger bobo apama atek kame luko Yerusalem.

¹⁹ Di do cunyi ko bino bedo yom pi giayala kopoore, kame obedo giamia awanga kede giamia kame kowango alutu; di oko bino yalo twonin i wi alutari nin.