Sabuli 5 - Baibuli I Leb Kumam 2013

Ilega me Kwano Gwok

¹ Winy kop na, Okwe Rwot; winy cur na.

² Winy koko na, in abaka kede Rubanga na, pien ango atie lego buti.

³ Okwe Rwot, in iwinyo dwana odiko; odiko ango acwao koko na buti di ako donyo kuro.

⁴ Pien likame in Rubanga kame cunye yom i kom tim areco; likame in inywako kede gikarac.

⁵ Joewaka likame twero tuno i nyimi; in idagi jo kame timo tim areco.

⁶ In imuducaro jo kame yamo kope me abe; Rwot cunye dagi jonek kede joangalo.

⁷ Do pi amara ni adwong kalikame lokere, ango abino donyo i odi; abino luro i nyimi i tempulo ni kacil pi mini wor.

⁸ Okwe Rwot, tela pien in ipoore, pien atie kede jokwor atot; mi yongayo nin kame atie lubo bed di oriere.

⁹ Pien kop kame dog jokwor na waco likame tie me ateni; cuny gi opong kede kop me nek; dwan gi cal bala ates kame wie oyabere; leb gi yamo kope amit me abe.

¹⁰ Okwe Rubanga, mi gi alola pi raco gi; mi iik gi en kame ret gi. Riam gi tenge pien dub gi tot, pien kijemo ne in.

¹¹ Do mi jo kame ringini gwok buti kilel, wek kiwer wer me ilel nakanaka. Gwok jo kame mari tetekeny kibed kede ilel piri.

¹² Pien in imio jo kopoore winyo, Okwe Rwot; in iumo gi kede amara nin bala ebuku.