Sabuli 49 - Baibuli I Leb Kumam 2013

Mingo me Geno Abar

¹ Winyunu, wun jo dedede, cikunu yitu, wun jo dedede kame bedo i piny,

² jo me ruom apiny kede me ruom amalo, jo obaro kede jocan karacel.

³ Doga bino yamo kope me rieko, cunya bino tamo kope me niang.

⁴ Abino ciko yita winyo kope me agole; abino gonyo dwong gi i were kame agoo kede adungu.

⁵ Kara abed kede lworo pinyo i kare me peko, ka jokwor na olukaro ango,

⁶ gin jo kame geno abar gi, di kiwakere pi twon abar kame kipong kede?

⁷ Ateteni likame tie ngatamoro kame twero culo cul me lako kuo mere; likame tie cul moro kame dano twero mino Rubanga pire.

⁸ Pien cul me lako kuo wel mere dwong, doko likame eromo

⁹ pi mino dano bedo kuo nakanaka di likame eko donyo i ates.

¹⁰ Kame oneno jo ariek, gida kito bala jomingo kede jo kame wi gi likame tio, di kiko weko abar gi ne jo apat.

¹¹ Atesin gi obedo miere gi pi kare lung, kakame kibino bedo iye ikar kede ikar, bed bala oudo kitie kede lobo kame odoko mergi.

¹² Dwongo ka dano likame romo genge to, en pwodi ebino to da bala leini.

¹³ Manoni en gikame bino timere ne jo kame tie kede gen me mingo; en ebedo ajikini me jo kame cuny gi yom i kom abar gi.

¹⁴ Kotieko iiko ne gin ot i kabedo me jo oto bala romini, to en kame bino bedo ngakwat gin; gin kitie ot donyo i ates; kom gi bino top; kabedo me jo oto bino bedo paco gi.

¹⁵ Do Rubanga bino lako kuo nango ki twer me kabedo me jo oto, piento en ebino gama.

¹⁶ Kur ibedunu kede lworo ka jo mogo odoko joabar, kame abar me ude gi onyai.

¹⁷ Pien ka gin kito, likame tie gimoro kame kibino tero; abar gi likame bino lubo gi piny i lobo.

¹⁸ Akadi bed bala i kare me kuo gi gin kitamo be kitie kede yomcuny, di jo pako gi pien gi dedede tie negi kiber,

¹⁹ gin kibino ot nywako kabedo kede joakwari gi, di likame bobo kiko bino neno lero atwal.

²⁰ Dwongo ka dano likame romo genge to, en pwodi ebino to da bala leini.