Sabuli 46 - Baibuli I Leb Kumam 2013

Rubanga tie kede Wa

¹ Rubanga en karingo wa me ot gwokere, doko en teko wa, en eikere cuto pi konyo wa ka otie kede peko.

² Pi mano, wan likame obino bedo lwor akadi di lobo oyangere, akadi di mori opopoto piny i dud name;

³ akadi di pii me nam kuao di emor, di mori ko yangere pi dipere mere i kom gi.

⁴ Tie ecilet moro kame mol mere kelo yomcuny i bomba ka Rubanga, i kabedo kacil ka Ngamalo Twal.

⁵ Rubanga tie i dier bomba nono; likame kobino dudubo en, obai di piny tie ru en ebino konye.

⁶ Atekerin dedede tie dorano pi lworo, ajakanuto tie tagere; ka en eyamo, dwane calaro lobo lung.

⁷ Rwot me jo yi tie kede wa; Rubanga ka Yakobo en karingo wa me ot gwokere.

⁸ Bia inenunu tice ka Rwot; bia inenunu gi me lworo kame Rwot otimo i wi lobo.

⁹ En ejiko yi i wi lobo dedede, etuturo tire me emal, enyonyobo tongini di eko wango ibukui i mac.

¹⁰ En ewaco be, “Bedunu mot, di ikounu ngeno be ango abedo Rubanga! Atekerin dedede miango dwongo, wi lobo lung miango dwongo.”

¹¹ Rwot me jo yi tie kede wa; Rubanga ka Yakobo en karingo wa me ot gwokere.