Sabuli 45 - Baibuli I Leb Kumam 2013

Wer me Awera i Nyom me Abaka

¹ Kope abeco opong i cunya; wer na ni awero ne abaka; leba tie bala kalamu kame ngaiwandik otieko iikere pi iwandik kede.

² In ibedo icuo acil kalamo cuo dedede; kope me kisa wok ki dogi; pi mano, Rubanga otieko mini winyo kame bedo nakanaka.

³ Twei epima ni i amuro ni, in twon dano atek; in dano kame tie kede deyo kede dwongo.

⁴ Di lubere kede dwongo nin, wanano asigira ni ioti iko lono yi pi gwoko kop me ateni kede tim kopoore; mi cingi me teko nyut tice ni me aura.

⁵ Tongini me emal nin bit, kicobo cuny jokwor nin; jo me atekerin dedede popoto piny i tieni.

⁶ Ajakanut nin, Okwe Rubanga, bedo ikar kede ikar. Ebela nin me pug nyuto be in ipugo jo iepone kopoore;

⁷ in imaro gikame opoore, do idagi gikame rac. Manono en komio Rubanga, kame obedo Rubanga nin, owiri, eko mini yomcuny kalamo jowoti dedede.

⁸ Igoen nin kokiro iye moe angwe kur, kame obedo mura, aloe, kede casia; jower goo nin adungu pi yomo cunyi i paco nin kame kotubuso kede lak liec.

⁹ Anyira me abakai da tie i kom mon kame koworo me turi, i badi tetu cam cungo iye dako nin, in abaka, di engapo mwolere kame kotimo kede saabu kame kojililo kiber.

¹⁰ Ateran me abaka, winy kop kame atie waco mi wi wil kede joe ni kede ot ka papa ni.

¹¹ Abaka bino miti pi cilo ni; bala kame en do etie kede bala ngadwong nin, miero do ibed kede wor bute.

¹² Jo me Taya bino kelo nin giamia, pi mino cunyi bedo yom kede gi; jo obaro me atekerin apapat bino kelo nin abar me epone dedede.

¹³ Kotubuso dako kame abaka oyaro nyomo i ode; kotubuso en kede igoen kame kotimo kede saabu.

¹⁴ Kotie tere but abaka di engapo igoen me erangi apapat; anyira kalikame pwodi ngeo cuo tie nyamaro en kilube ki cen.

¹⁵ Kotie telo gi ot donyo i ot me abaka kede twon kilel kede yomcuny.

¹⁶ Okwe abaka, awobe ni do bino bedo abakai kawang joakwari ni; in ibino mino gi kidoko jopug i wi lobo lung.

¹⁷ Ango abino mino lwak me kare dedede yutuno nyingi, pi mano, atekerin bino pako nyingi ikar kede ikar.