Sabuli 42 - Baibuli I Leb Kumam 2013

ITABU ME ARE Sabuli 42—72 Ilega me Dano Koringo Ot Bedo i Piny Apat

¹ Bala kite kame atil mo kede esamai amol, kamanono da cunya paro neni, Okwe Rubanga.

² Atie kede mit adwong me neno Rubanga i kuo na, en Rubanga akuo. Kara awene en kame ango abino bino kede di ako neno wangi, Okwe Rubanga?

³ Akok iceng kede iwor, pigewanga do tie bala cam na; jo do penya nakanaka be, “Kara Rubanga ni tie tuai?”

⁴ Ango ayutuno gigi kede cwercuny: epone kame oudo aoto kede ekodet me jo, di atelo gi sirito donyo i ot ka Rubanga, di olelemo kede kilel kede di owero were me pwoc, pi kwero ebaga.

⁵ Pinyo komio atie kede cwercuny? Pinyo komio aparere? Abino keto gen na but Rubanga; abino medo pake, en ngakony na, doko en Rubanga na.

⁶ Atie kede cwercuny i kuo na; omio ango ayutuno in cako ki Yorodan kede Kerimon, cako ki wi moru me Misar.

⁷ In icwao na cwercuny bala ebuka, kame mor bala pii atut kame lwongo pii atut, i mor me pii kame mol di poto piny ki emukura; cwercuny omwonya bala twon ebuka.

⁸ Iceng Rwot nyuto na amara mere kalikame lokere; iwor ango ako wero ne wer, en ilega but Rubanga ngat kame mia abedo kuo.

⁹ Awaco ne Rubanga, lela na be, “Pinyo komio wi owil keda? Pinyo kamio abedo kede iturur pi raco kame jokwor timo na?”

¹⁰ Ayet me jokwor na rama ineno bala twon adola moro tie i koma, di kiwaco na nakanaka be, “Rubanga ni tie tuai?”

¹¹ Pinyo komio atie kede cwercuny? Pinyo komio aparere? Abino keto gen na but Rubanga; abino medo pake, en ngakony na, doko en Rubanga na.