Sabuli 4 - Baibuli I Leb Kumam 2013

Ilega i kare me Peko

¹ Gam kwac na kame akok buti, in Rubanga kame gwoko twero na! I kare kame oudo atie kede i peko, in imia alakanar. Bed kede kisa buta iko gamo ilega na.

² Wun ba, ibinunu mina lewic pi kare arom amene? Ibinunu maro kope me abe kede kope kame kony gi li pi kare arom amene?

³ Do ngeunu be Rwot otieko yero jo kopoore pi bedo jo mege; Rwot gamo kwac na ka akok bute.

⁴ Ka gero omaki, kur idonyi i dub; par kop nono eliling i kabuto.

⁵ Miunu giayala kame poore, doko ketunu genu i kom Rwot.

⁶ Tie jo atot kame waco be, “Okwe, koto oneno bero moro da! Rwot nen wa kede wangi me kisa.”

⁷ In imia abedo kede yomcuny, kalamo jo kame okao kac kede koudo bwini atot.

⁸ Ango abino buto di ako nino kede anapakin; pien in keni Rwot en kame igwoka kiber.