Sabuli 39 - Baibuli I Leb Kumam 2013

Tuco Dub me Dano kame Tie Neno Can

¹ Ango bin awaco be, “Abino gwokere ki gi dedede kame atimo tetekeny kur leba mia atim dub; ango ayaro kuno doga, tek kame jo areco tie iyapiyapi keda.”

² Ango ako ling titi; likame ako yamo akadi kop i kom gimoro aber. Do cwercunya oko meede ameda,

³ di cunya likame oko bedo kede dire. Meede bedo kede par oudo medo cwercunya ameda; di do ango ako waco be:

⁴ “Rwot, mia angei ajikini me kuo na, kara pwodi ango adong kede kare kame rom amene? Mia angei ceko me kuo na.”

⁵ Neni, in itieko mino kare me kuo na obedo cecek, doko kare me kuo na tie bala gimoro li i wangi. Ateteni jo dedede cal acala bala yamo kame buko.

⁶ Ateteni ngat acelacel rwenyo bala tipo me yat. Ateteni gin kicane nono; kidiato jame do likame kingeo jo kame bino tero jame gi nogo.

⁷ Nan do nyo kame ango atie geno, Okwe Rwot? Gen nango tie buti.

⁸ Laka ki dub na dedede. Kur imia adok gianyera me jomingo.

⁹ Ango do aling; likame bobo abino ngamo doga, pien in en kame itieko timo nango kamanoni.

¹⁰ Jik do alola kame imia; abap me cingi otieko teko na.

¹¹ In ibunano jo kame itie mino gi alola pi dub gi, bala ajekel, in idudubo gikame gin kimaro twatwal; ateteni jo dedede cal acala bala yamo kame dano wei kede.

¹² Okwe Rwot, winy ilega na, cik yiti iwiny koko na; kur ilingi alinga kame ango akok buti. Pien ango atie welo nin kame obeo abea pi kare acecek, ango ngakumbor bala bin joakwari na dedede.

¹³ Wek do ngina, tetekeny abed bobo kede yomcuny, di pwodi likame ayai ki kuo me lobo kan, di ako doko li atwal.