Sabuli 38 - Baibuli I Leb Kumam 2013

I lega me Dano kame tie Neno Can

¹ Okwe Rwot, kur ibunano ango kede gero, arabo ibitaro ango kede lilo.

² Pien itieko cocobo ango kede imalia ni, doko cingi otieko bapa.

³ Ringo me koma li kede yotkom pi wangcuny nin; dub na omio cogere na li kede yoto.

⁴ Dub na ikumemei kalamo ango; kipek bala yec kalikame akaruno yeno.

⁵ Aporeso na odoko ngwe, doko kitie do top pi mingo na.

⁶ Aloore do atwal atwala ariebere piny; ango atururo piny yuluyul.

⁷ Pien piera mwoda twatwal, ali kede yotkom.

⁸ Teko na otiek, doko atieko nyongere; ango acur pi kop ramo cunya.

⁹ Okwe Rwot, in ingeo mit me cunya; likame in ikwia dinyo nango.

¹⁰ Cunya keto pukpuk, teko na otiek; wanga da odoko do mwadamwada.

¹¹ Jowota kede joaupa na likame noka pi buge me koma, akadi jokio na da cungo tenge kakabor.

¹² Jo kame mito neka ciko na owic gi; jo kame mito timo na raco yamo i rac i koma, doko kibedo iiko tam arac i koma piny yuluyul.

¹³ Do ango abedo bala edingo, likame awinyo kop; abedo bala ngat kame lebe li, ngat kalikame karuno yamo.

¹⁴ Ateteni, ango acal bala ngat kalikame winyo kop, ngat kalikame doge tie me dwoko kop.

¹⁵ Do in en kame ango aketo gen na buti, Okwe Rwot; in ibino gamo ilega na, Okwe Rwot Rubanga na.

¹⁶ Pien ango alego be, “Kur iwek jokwor na leli i wia, jo kame wakere i koma ka acetar.”

¹⁷ Pien ango ayapuno poto, doko lito tie na nakanaka.

¹⁸ Ango atuco gikareco na; ango aturere pi dub na.

¹⁹ Jo kame obedo jokwor na abongo gimoro kame atimo negi tek twatwal, doko jo kame daga nono nono tot.

²⁰ Jo kame timo na raco pi bero kame ango atimo negi obedo jokwor na pien ango alubo gikame ber.

²¹ Okwe Rwot, kur iweka; Okwe Rubanga na, kur ibed bor keda;

²² susunyo konya, Okwe Rwot, ngalak na.