Sabuli 36 - Baibuli I Leb Kumam 2013

Raco ka Dano

¹ Jo areco winyo dwan me timo dub yamo i cuny gi; gin likame kilworo Rubanga i kuo gi.

² Pien gin kisuk ken gi, gin likame kiparo be kokaruno ngeno dub gi di oko waco be erac.

³ Kope kame wok ki dog gi obedo kope areco kede me angalo; gin do kijiko timo gikame nyuto rieko kede kame ber.

⁴ Gin kiiko tam me timo gikarac di kitie buto i apiene gi; gin kitie i yongayo kalikame ber; gin likame kidagi gikarac.

Bero ka Rubanga

⁵ Rwot, amara nin kalikame lokere wapere tuno malo, genere nin tuno i idoun.

⁶ Poore nin cal bala mori adongodongo, ngolo kop nin cal bala nam atut; Okwe Rwot, in igwoko jo kede leini di rom aroma.

⁷ Amara nin kalikame lokere tin ber benyo, Okwe Rwot! Jo dedede karuno ringo ot gwokere i tipo me bwomi.

⁸ Gin kicamo di kiko yeng kede cam atot kame tie i odi, doko in imio gi giamata kame wok ki ecilet me bero nin.

⁹ Pien kuo wok kibuti; lero kame wok kibuti en kame mio wan lero.

¹⁰ Okwe meede nyuto amara ni kalikame lokere but jo kame ngei, doko meede nyuto alako nin but jo kopoore.

¹¹ Kur iwek joewaka nyonyono ango, doko da kur iwek cing jo areco mia aringi.

¹² Neningo jo kame timo gikareco otieko popoto piny ariebacuny; korwarwaco gi piny, likame kikaruno yai malo.