Sabuli 35 - Baibuli I Leb Kumam 2013

Ilega me Kwano Kony

¹ Okwe Rwot, ute kede jo kame ute keda; yi kede jo kame yi keda!

² Mak ebuku ni kede gi me gano komi pukupuk, di iko yai ikonya!

³ Kwany tong kede macar ni pi yi kede jo atie wapa; mia ngeno ateteni be in ibino laka.

⁴ Mi bwon jo kame mito neka di oko mino gi lewic. Mi koriam jo kame iiko tam arac i koma di kiko bedo kede atotolun.

⁵ Mi gi kibed bala ocucung kame yamo tie kuto, di malaika ka Rwot tie riamere kede gi.

⁶ Mi yongayo kame kilubo bed col di pwot pi cero gi, di malaika ka Rwot wapo gi.

⁷ Gin kiciko na obek gi be amok iye abongo kop moro; doko kikunyo na bur be apot iye abongo kop moro.

⁸ Mi gi kimuducar abongo gin ngeno. Doko mi obek kame gin kiciko mak gi; mi gi kipot i bur di kiko muducar.

⁹ Di do ango ako bino ilel pi Rwot, alelo piento en elaka.

¹⁰ Abino waco ne Rwot kede cunya dedede be, “Okwe Rwot, ngai kame cal bala in? In ilako jo agoro ki cing jo abwono gi, kede jocan ki cing jo ayako gi.”

¹¹ Ijurak me abe cungo di kiko pepenyo ango kop i kom gikame ango akwia.

¹² Gin kitimo nango raco pi bero kame ango atimo; kimia kuo me par.

¹³ Do i kare kame gin oudo kituwo kede, ango ako ngapo igoen me iturur; atidilo koma kede kanyo kec. Ango ako lego di akudo wia i kora,

¹⁴ bala oudo atie iturur pi adieruna arabo omina; abedo bala dano atie koko toto mere, aluro piny di atururo.

¹⁵ Do kakame ango apoto kede i peko, gin kiko cokere kede yomcuny, kicokere karacel sura; jogero kalikame ango oudo angeo oko donyo timo na raco nakanaka.

¹⁶ Gin kinyera di kimeede ameda iye abongo wor, di kikakao lak gi pi nyuto gero gi i koma.

¹⁷ Okwe Rwot, kara in iyaro tero kare arom amene di ineno gi anena? Laka ki asura gi, lak kuo na kibut inguon nogi!

¹⁸ Di do ango ako bino pwoni i kacokere adwong me jo ni; ango abino paki i dier jo atot nogo.

¹⁹ Kur iwek jokwor na, jo abe go, lel i wia, bobo da kur iwek jo kame daga abongo tien kop moro bed muremure pi peko na.

²⁰ Gin likame kiyamo kop kame kelo mulem, do kicweo kope me abe i kom jo kame bedo mot.

²¹ Gin kipida di kilelemo be, “Ee, Ee, wan otieko neno kede wang wa.”

²² Okwe Rwot, in itieko neno; kur ilingi! Okwe Rwot, kur ibed bor keda!

²³ Cei, di iko konya, Yai ipid pira, Okwe Rubanga na kede Rwot na!

²⁴ Okwe Rwot Rubanga na, gonya abed bongo raco moro, di lubere kede poore nin, doko kur iwek gi kibed kede ilel i wia.

²⁵ Kur iwek gi kiwac ken gi be, “Ee, wan otieko udo gikame oudo omito.” Kur iwek gi kiwac be, “Wan otieko muducaro en.”

²⁶ Mi lewic kede atotolun mak jo dedede kame lelo pi can nango; mi lewic mak jo kame wakere nango di oko kwanyo wor kibut gi.

²⁷ Mi jo kame mito nango lono pido lelemo pi ilel di kiko bedo kede yomcuny, di kiwaco nakanaka be, “Rwot dwong! En cunye yom kame ngatic mere tie i mulem.”

²⁸ Di do ango ako bino tatamo kop me poore nin di apaki piny yuluyul.