Sabuli 31 - Baibuli I Leb Kumam 2013

Ilega me Bedo kede Gen i kom Rubanga

¹ Okwe Rwot, in en kame ango aringini buti pi gwoka; kur imi lewic maka; laka pien in ipoore.

² Cik yiti iwinya; laka awakawaka. Bed bala lela kame ango aringo ot gwokere iye, bed apama atek kame laka.

³ Ateteni in itie bala lela nango kede apama na kame gwoka; tela di iko nyuto na gi me atima pi nyingi.

⁴ Gwoka ki bwoi kame jokwor ocika kede, pien in en ngat kame ango aringo ot gwokere bute.

⁵ Ango amio kuo na i cingi; Okwe Rwot, Rubanga kame genere, in itieko laka.

⁶ In cunyi dagi jo kame woro caljwogi gikame kony gi li, do ango ageni.

⁷ Ango abino bedo kede yomcuny kede ilel pi amara ni kalikame lokere, pien in itieko neno can na; in itieko ngeno peko na.

⁸ In likame imia i cing jokwor; in imia alatao bala kame amito.

⁹ Okwe Rwot, tima kisa, pien atie i peko; wanga opongupongun pi koko, teko na da otiek.

¹⁰ Aol kede iturur, koko otieko mino kuo na odoko cecek; peko otieko teko na, akadi cogo na da odoko goro.

¹¹ Ango adoko gi me nyero ne jokwor na, gikame neno rac ne jokio na, gikame kelo lworo ne jo onao keda; jo kame nena i yongayo ringo tenge.

¹² Wi jo otieko wil keda bala dano oto; atieko doko bala agulu oto.

¹³ Pien awinyo iwewei me jo atot; lworo oluka i bad dedede. Gin kiporo kop i koma karacel, pi kwanyo kuo na.

¹⁴ Do ango gira ageni, Okwe Rwot; awaco be, “In Rubanga na.”

¹⁵ Kuo nango tie i cingi; laka ki cing jokwor na, jo kame tidilo ango.

¹⁶ Mi kisa maki kede ngatic ni; laka pi amara ni kalikame lokere.

¹⁷ Okwe Rwot, kur imi lewic maka, pien ango akok buti; mi lewic mak jo areco; mi gi kiot eliling tuno i kabedo me jo oto.

¹⁸ Mi dog joangalo lingi, dog kame yamo kop arac i kom jo kopoore kede ewaka kede acae.

¹⁹ Okwe, bero kame in ikano ne jo kame wori tin dwong benyo, kame iko mino oko cobere i nyim jo dedede but jo kame ringini gwokere buti.

²⁰ In ikano gi kakame in itie iye, ikano gi ki kope kame jo poro i kom gi; in ikano gi kiber i odi, ikano gi ki leb areco.

²¹ Pak bed but Rwot, pieto en etieko nyuto nango amara mere kalikame lokere iepone me aura, i kare kame oudo koluka kede bala bomba kame jokwor oluko.

²² Pi lworo, omio ako waco be, “Kotieko riama tenge kakabor kedi.” Do in iko winyo koko na i kare kame alwongere kede buti pi konya.

²³ Marunu Rwot, wun jo mege kacil dedede. Rwot gwoko jo kame gene, do eculo ngat kame wakere bala kame poore ne.

²⁴ Bedunu tek, doko miunu cunyu bed nwang, wun jo dedede kame geno Rwot.